MMEA Miri mujur ngetan dua buah bot kargo berikan, nangkap 27 rayat Vietnam
MIRI: Ejensi Neritka Adat Maritim Malaysia (MMEA) nangkap 27 iku rayat Vietnam lalu ngerampas urung 10,000 asil marin ke dipelabaka manggai penyampau rega RM100,000 di tasik Miri, kemari.
Ba siti penerang ti dipansutka ulih Ketuai Zon MMEA, Kapt Mohamad Fauzi Othman madahka raban MMEA ke ngena kapal penginau bejalai ngabas tasik nya meda dua buah kargo kapal berikan ke dipelabaka berikan ba zon ke ditagang, urung dua nautikal ari kapal penginau nya dalam urung pukul 6.15 lemai.
“Dalam urung pukul 6.35 lemai, kapal penginau maritim ngetan sebuah bot kargo di rejista ngena nama ‘ One United 35’, lalu bot kedua, ‘One United 25’ kena tan dalam urung pukul 6.55 lemai.
“Kededua buah bot kargo berikan nya ditan urung 35 batu nautika luar ari sungai Miri,” ku iya.
Lebuh meresa kededua buah bot berikan nya, pegawai patrol maritim tetemuka urung 10,000 kilogram asil marin, ke dipelabaka berega dalam RM100,000.
“Semua krew ke berumur entara 18 ngagai 48 taun bela ditangkap, alai dua ari 27 pemayuh sida iya ditemu nadai pengelala,” ku Fauzi.
Kededua buah bot kargo berikan udah nya ditemu nadai lisin kena belayar, lalu udah nya bela kena rampas, ngambika ulih ditasat enggau silik agi.
MMEA benung nasat kes tu nengah genteran tusun ukum Akta Berikan 1985, Akta Imigresen 1959/ 63 sereta Ordinan Kapal Dagang 1952/ 1960.