Dua buah gerempung ukai Islam nerima geran RM700 ribu ari Perintah Nengeri
KUCHING: Dua buah gerempung ari pengarap bukai ( ukai Islam) kemari nerima penyampau geran ari Perintah Nengeri, dalam RM700,000.
Penerima geran nya, Opis Diosis Anglika, Kuching nerima RM500,000 lalu Gerempung Kuil Sikh Sarawak, nerima RM200,000.
Ungkup RM500,000 ti diberi ngagai St. Thomas House of Epiphany laban deka ngaga St. Thomas House of Epiphany lalu RM200,000 kena mantu Gerempung Kuil Sikh Sarawak kena mantu ngaga palan dapur besai alai nunu bangkai (enti bisi pemati).
Sapit Kepala Menteri Datuk Amar Douglas Uggah nyuaka cek nya ngagai Penulung Bishop Rev Nelson Ugas ke ngarika St. Thomas House of Epiphany, lalu Dr. Kalwinder Singh Khaira ti mega nyadi presiden Gerempung Sikh Sarawak nerima cek ngarika Gerempung Kuil Sikh Sarawak.
Lebuh bejaku ba atur pengawa nya, Uggah madahka ke taun tu, Kepala Menteri Datuk Patinggi Abang Johari Tun Openg udah ngemendarka urung RM20 juta ke unit nya (Unifor).
Naka kediatu (naka bulan April-May), urung RM15.87 juta udah dibagi ngagai 206 penerima, lalu laluh ungkup nya deka diberi ba renggat kedua taun tu.
“Dalam taun 2017, Kepala Menteri bisi madahka ungkup ninting taun ari wang turu menua bisi diungkup ke UNIFORM, kena mantu pengarap bukai (ukai Islam), ke ulih dikena sida iya ngaga sereta miki palan endur sembiang (Keristen, Buddhist, Hindu, Sikh, Bahai sereta pengarap ukai Islam bukai) di menua tu.
“Taun siti nyin tadi, Perintah Menua Sarawak udah ngemendarka ungkup urung RM15 juta, ke meri penguntung ngagai 77 penerima,” ku iya.
Sapit Sekretari Perintah Menua, Datu Jaul Samion, Direktor, Unifor, Datu Dr Ngenang Janggu, sekretari besai Gerempung Gerija Sarawak, Ambrose Linang enggau sekretari opis diosis Anglika, Rev John Shim sama bisi enggau ngulu atur pengawa nya kemari.