BERSATU, UMNO di Sarawak patut dipeda ari sukut positif: Dr Juanda
MUKAH: Engka penatai dua parti politik ari Semenanjung Malaysia iya nya Parti Pribumi Bersatu Malaysia (BERSATU) enggau mega UMNO patut diperati nyadi siti pekara besai ngayanka gaya politik Sarawak.
Kaban Kunsil Kereja Tetinggi (AMKT) Parti Pesaka Bumiputera Bersatu ( PBB) Datuk Dr Juanda Jaya madahka tu pekara endang diterima dikena ngamaika demokrasyen kelebih agi di Sarawak.
“Nadai salah tama ngagai Sarawak, enti semua lurus gawaka rayat endang diterima (penatai),” ku iya madah ngagai Utusan Borneo kemari.
Iya mansutka jaku nya lebuhka ditanya bekaul enggau penerang Presiden BERSATU, Tun Dr Mahathir Mohamad, ti madahka niat parti nya deka ngerembaika sayap sida datai ke Sarawak.
Taja pia, berebak enggau nya Mahathir madahka BERSATU enda deka ke Sabah laban bisi bakih sida, Parti Warisan.
“Baka nya mega UMNO ti udah bisi di Sabah, nadai mega tagang ngagai Sarawak,” ku Juanda.
Ke amat, iya ngarapka pekara ti nyadi enggau penama kededua parti BERSATU enggau UMNO ke Sarawak semina pulaika pemaik nengeri tu lalu enda lebih ari nya.
Ngelansa pasal penemu PBB ku iya, iya madahka parti nya nadai nagang atur pejalai demokratik nya.
“Tambah mega, rayat empu deka meatika semua iya,” ku iya.
Iya andal amat UMNO mega deka tama ngagai Sarawak enti sema BERSATU ngaga baka nya.
Sebedau tu, PBB nyadi parti tunjang dalam kom- ponen Barisan Nasional (BN) Sarawak tang pengudah Pengawa Bepilih Besai Ke-14 (PRU-14), BN puntan numbuhka perintah di renggat perintah besai.
Tang pe r int ah t i ditempa enggau pemenang majorita muntang perintah Pakatan Harapan ( HARAPAN) datai ari empat parti besai iya nya BERSATU, Parti Keadilan Rakyat (PKR), Parti Tindakan Demokratik (DAP) enggau Parti Amanah Negara (AMANAH).
Empat parti komponen BN Sarawak udah ngaga pemutus pansut ari gempung BN, iya nya PBB, Parti Sa’ati Rayat Sarawak (SUPP), Parti Rakyat Sarawak (PRS) enggau Parti Progresif Demokratik (PDP) lalu numbuhka siti gempung baru, Gabungan Parti Sarawak (GPS).
BN ari 13 parti komponen ti nyemilik iya sebedau PRU 14, diatu semina tinggal tiga aja, iya nya UMNO, MCA enggau MIC ke alai Parti GERAKAN nyadi parti kepenudi ninggalka gempung nya.