Raban bansa Dayak patut ngemeranka pemanah kaul enggau pangan diri
SARIKEI: Kaban Kunsil Nengeri ( ADUN) Repok, Dato Sri Huang Tiong Sii minta raban bansa Dayak menua tu ngemeranka pemanah kaul enggau pangan diri sereta mega bala bakih ari raban bansa bukai.
Iya pechaya, Gawai Dayak, baka sebarang hari besai bukai baka Hari Raya, Taun Baru China, Krismas udah nyediaka pelasar chukup manah ngagai bemacham bansa ti begulai baka kitai dikena negapka agi penyerakup enggau pengelantang, ku Huang dalam jaku pesan iya beserimbai enggau pengerami Ngiling Tikai kelai nutup pengerai Gawai Dayak Renggat Bagi Menua Sarikei 2018 di Balai Makit Sentral ditu, malam Hari Enam tu tadi.
Jaku iya udah dibacha Chairperson Kaunsil Pelilih Sarikei, Wong Zee Yeng, ti ngarika Huang nyadi temuai dipebasa rambau atur pengerami nya.
Huang muji bala komiti pengatur teulihka pemujur ngatur pengerami taja iya ngempuruka bala pengari ari mayuh bengkah gempung Dayak baka Gerempung Bansa Dayak Sarawak ( SDNU), Serakup Dayak Iban Sarawak ( Sadia), Serakup Indu Dayak Sarawak ( SIDS), Serakup Bansa Dayak Bidayuh ( DBNA) enggau Serakup Tuai Rumah enggau Ketuai Raban Bansa Iban Pelilih.
Pemujur tu ngayanka peneguh kaul ‘Penyerakup dalam Pengelain’ dalam komuniti kitai, ku Huang nambah.
Antara bala ke bisi datai Chairman Pengatur Penghulu Bidai Gisang, Pemesai Pelilih Sarikei Christopher Ranggau, Pemancha Edward Laden sereta bala ketuai raban bansa Dayak ke bukai antara 800 iku bala bukai.