651 iti saman udah dipansutka ba Ops Khas Hari Raya 2018
KUCHING: Opis Perengka Pengangkut Darat ( JPJ) Sarawak udah meresa 8,527 buah perengka pengangkut lalu bisi 651 iti saman udah dikeluarka ba myuh macham penyalah semanjai dua minggu Ops Khas Hari Raya Aidilfitri 2018 ke udah tembu kena Hari Minggu tu tadi.
Direktor JPJ Sarawak Mohd Syafiq Anas Abdullah madahka penyalah nadai lisin deriba ti ngembuan saman ke pemadu mayuh iya nya 267 iti kes, seraya ditangkan penyalah plat ti enda nitihka spesifikasyen (110 kes) lalu lisin deriba ke udah abis timpuh iya nya bisi 86 iti kes.
“Bisi mega penyalah bukai ke sama udah diberi saman iya nya nyengkaum penyalah ngelih ba garis begembar (52 kes), lisin udah abis timpuh, taya ti nadai bunga, sereta kelalu berat.
“Kelimpah ari nya, bisi 256 iti notis udah dipansutka iya nya nyengkaum notis enda tau ngena perengka pengangkut bisi 109 iti kes, notis ‘temu siasat’ bisi 57 iti kes, notis ‘arah timbang’ bisi 55 iti kes, notis ‘arah periksa kenderaan’ (22 kes) lalu notis LPKP bisi 13 iti kes,” ku iya.
Iya madah munyi nya ba penerang bekaul operasyen nya ti udah berengkah kena 8 Jun tu tadi, ditu kemari.
“Ungkup sebedau timpuh pengerami ( 13 enggau 14 Jun), bisi 20 saman udah dipansutka iya nya tiga ungkup lori ti mai batu, tanah enggau pasir lalu 20 agi iya nya ungkup lori ke bukai.
“Lalu kena 23 enggau 24 Jun, semina tiga saman udah dipansutka iya nya ungkup lori ‘low-loader’ sereta perengka pengangkut enggau lori ‘timber-jinker’,” ku iya.
Syafiq mega madahka batang tuju bejalaika operasyen khas nya dikena meri pengelantang sereta pengelikun ngagai penguna jalai alun ngambika seruran mai perengka pengangkut enggau bejimat nyentukka datai ngagai palan ti deka dituju sida.
“Nengah operasyen bansa tu, dikearap ulih nambahka ‘Perception Of Being Cought’ ngagai semua penguna jalai alun.
“Kelimpah ari nya, dikearap mega tu ulih ngemeranka chara deriba enggau manah sereta likun ungkup penguna jalai alun lalu pia mega ulih ngurangka kes bebadi sereta bebadi nyawa ba jalai alun,” ku iya nyemetak.