SCRHA minta bayar Chukai Dagang Temuai ke temuai menua luar diserenih baru
SIBU: Gerempung Util Sitak Tengah Sarawak (SCRHA) minta bayar Chukai Dagang Temuai RM10 diletak ngagai temuai menua bukai dipansik baru.
Chairman gerempung tu, Johnny Wong madah, penyampau chukai nya dibayar temuai ke diau ba util mit enda engkeman.
Ba penemu iya, Chukai Dagang Temuai patut dipansik Opis Menteri Dagang Temuai baru bepun mayuh sebana dikenataika temuai menua luar ti deka diau ba util mit.
Iya madah, penyampau nya tau dikurang ngagai RM2.50 semalam, ti dipeda engkeman agi.
“Ba util dua, tiga tauka empat bintang penyampau bayar RM10 nyangka nadai penanggul tang enti util mit penyampau nya kelalu besai.
“Kebuah pia laban bisi util mit tu ngeletak bayar RM40 nyentuk RM50 semalam kelimpah temuai dipinta mayar chukai RM10,” pia ku iya madah.
Sebedau tu bisi perambu minta Chukai Dagang Temuai ungkup util mit ditetapka enggau bayar RM2.50.
“Kitai meda penyampau nya engkeman tauka lebih mimit ari nya agi ulih diterima,” ku iya sambil madah ubah tu tau bendar mai ubah ngagai industri util di Sibu ditu.
Enti dibida enggau di Semenanjung Malaysia, ku Wong, tebal agi util dini betikas bintang sereta stindit ke tinggi agi ari util di Sibu tauka di Sarawak.
“Enti kitai nyau bela ngeletak bayar RM10 semalam, tu baka enda engkeman ba sida.
“Enda ulih disalam di Sibu, temuai menua bukai agi mimit lalu opis menteri meseti meda pekara tu.
“Kitai enda ningkah penemu perintah bejalaika Chukai Dagang Temuai tu tang penyampau ke diatu dipeda kelalu besai ba util mit,” pia ku iya nerang.