BP Run Renggat Ke-8 majak nerima sambut ke manah ari mensia mayuh
SIBU: Komiti pengatur Borneo Post (BP) Run Renggat Ke- 8 merambu program nya deka matak 3,000 iku penyereta.
Sapit Direktor Pengatur Kumpulan Syarikat KTS Temenggong Dato Vincent Lau Lee Ming madah, kenyau ke diatur ari taun 2011, BP Run majak nerima sambut ke manah ari mensia mayuh.
Iya enggau tu mai mensia mayuh datai ngambi bagi ba program nya ti deka diatur kena 31 Ogos tu ba Dataran Bandar Sibu Fasa I.
“Program tu bela nyadi siti ari tanggungpengawa rama korporat (CSR) Kumpulan See Hua ba tuju ngemeratka pengidup bepengerai,” pia ku iya maya aum media ditu, ensana.
Lau madah, 2,000 iku sida ke dulu ngerejister nama deka diberi tula, baju enggau produk pemakai Wanfa ‘My Fish’ ari komiti pengatur.
Naka ke diatu lebih 1,000 iku penyereta udah nganjung nama ngambi bagi ba program nya.
Keterubah diatur suba, program nya nerima urung 600 iku penyereta.
BP Run tu bela ngembuan tuju deka nyadika pelasar nyintal kaul pupu raban bansa ba menua tu.
Ba program tu bisi lima iti kategori digaga iya nya 10 Kilometer Lelaki enggau Indu Tebuka, 10 Kilometer Lelaki enggau Indu Junior enggau 5 Kilometer Fun Run.
Perais ba Kategori 10 Kilometer Lelaki enggau Indu iya nya RM300 ungkup champion, lumur dua (RM250), lumur tiga ( RM200), empat enggau lima (RM150 enggau RM100).
Perais sagu ati lumur enam ngagai 20 iya nya RM30.
Champion Kategori Junior Lelaki enggau Indu iya nya RM250, lumur dua (RM200), lumur tiga ( RM150), lumur enggau enggau lima (RM100 enggau RM50).
Sagu ati lumur enam ngagai lumur 50 iya nya RM20.
Champion Kategori Fun Run iya nya RM150, lumur dua (RM120), lumur tiga ( RM100), lumur empat enggau lima (RM80 enggau RM60).
Lumur enam nyentuk lumur ke 120 mai perais sagi ati RM20.
Pengawa nganjung nama enda laun ari 15 Ogos tu.
Penerang silik tau ditanya ngagai Opis The Borneo Post nengah lumur 084- 315252 tauka faks ( 084- 320549).
Kelimpah ari nya, pen- erang program tu tau dipeda ba www. theborneopost. com.