Nya semina chara sementara mutarka penanggul 371 sekula ke agi ngena injin api ti begunaka disambung bekal karan ari grid
KUCHING: Penanggul bekaul enggau infrastruktur sereta perengkaguna ke ditapi sekula kelebih agi di menua pesisir Sarawak udah dikenataika ngagai Perintah Besai Pakatan Harapan nengah Opis Menteri Pelajar.
Menteri Pelajar, Sains enggau Pansik Teknologi Dato Sri Micahel Manyin Jawong, madahka isu nya dikenataika iya maya ti betemu enggau Menteri pelajar ti baru iya nya Dr. Maszlee Malik, Hari Lima apin lama.
Ku iya maya isu diesel nya suba, penanggul sekula suntuk bekal diesel bisi dikenataika ngagai opis menteri lalu menteri enggau lengkas iya nya maya Hari Ngundi sekula bisi keluar madahka diesel deka dibekalka.
Semina chara mutarka penanggul nya sementara aja, tang 371 buah sekula ba nengeri tu ke agi ngena injin api nya begunaka chara mutarka penanggul timpuh panjai baka disambung bekal karan.
“Hari Lima apin lama kami bisi ke Kuala Lumpur betemu enggau menteri (pelajar),batang randau kami iya nya bekaul enggau bekal diesel. Abis nadai ngagai ujung taun penanggul enda chukup bekal diesel enda agi nyadi ba 371 buah sekula (ke agi ngena injin api).
“Kena mutarka isu tu, kitai deka nyambung ari grid, laban mayuh sekula tu semak enggau grid, lalu Opis Pelajar dah ngelala bagi sekula nya sereta ukai udah nulis surat ngagai menteri ke sebedau tu lalu iya setuju 80 buah sekula patut disambung ari grid, tang sayau amat kitai nadai udah nerima ungkup belanja, kitai nganti.
“Lalu nya mih kebuah kami betemu enggau menteri (baru) sereta ngarapka iya ulih ngagihka kitai belanja dikena nyambung karan ari grid ngagai sekula laban tu mih chara mutarka penanggul nya ke pemadu dudi,” ku iya.
Manyin mansutka pekara nya dalam aum pengarang berita, pengudah ngemataka pengawa nyerahka Sempekat Pemereti Ati (MoU) entara Pusat Pembangunan Kemahiran Sarawak (PKKS) enggau 33 buah sekula iru ti diatur ba Auditorium PPKS ditu, kemari.
Bejaku baru, Manyin madahka isu sekula tuai sereta jai ba Sarawak mega entara pekara berat dikenataika ngagai Menteri Pelajar ke baru nya.
Ku iya, isu nya sebedau tu udah dikenatai sereta agih belanja RM1 billion udah bisi diungkup sereta dikemendarka opis menteri dalam perintah besai ke dulu ari tu, dikena ngemanah sereta ngaga baru sekula nya.
“Bekaul enggau sekula tuai sereta jai ba nengeri tu, bulan Julai taun nyin kemari kala betemu enggau Sapit Kepala Menteri enggau menteri pelajar sebedau tu, ke alai sida setuju meri kitai RM1 billion ti dikemendarka dibaruh bajet taun yin kemari, tang lalu bedau dipejalaika.
“Pekara tu ditandu aku baru ngagai Menteri baru maya ke betemu enggau iya Hari Lima apin lama, tang kitai deka nyentuk agi pasal pekara laban tu udah dikemendar sebedau tu nya alai agih belanja nya patut diberi ngagai Sarawak dikena kitai bejalaika dalam timpuh dua taun,” ku iya.
Ba Sarawak bisi urung 1,020 sekula ke udah tuai tauka kelalu lama lalu ari penyampau nya 415 buah udah tuai sereta kelalu jai.
Nambahka nya, Manyin madahka isu sekula ke mimit penyampau nembiak ke patut digulaika mega dikenataika ngagai menteri nya, dikena ngurangka ungkus belanja ngemanah tauka nyeruri sekula.
Maya betemu enggau menteri nya, iya mega ngenang pasal sekula ke digaga ba tebing ai sereta betapi enggau penusah ampuh bah nyema musim pengujan.
Agih belanja dikena mantu tetiap sekula ke ba tebing ai ti kena penusah ampuh bah udah diungkup bepelasarka peminta ari Kepala Pengajar, ku iya.
“Tang kitai minta menteri ulih meda penanggul sereta chara mutarka nya enggau manah agi , laban kitai enda ulih terus nyeruri aja tang kitai patut ngaga baru ba endur ke baru. Ngarapka ulih dipejalaika taun tu.
“Kelimpah ari nya, kitai diatu mega bisi 428 buah sekula betapi enggau nadai bekal ai beresi, sekula tu ngepam ai ari sungai sereta ngena ai ujan.
“Pekara (bekal ai beresi) mega dikerandau enggau menteri baru, kitai ngarapka iya ngagihka belanja ke tuju nya, laban opis pelajar udah nyendiaka utai ke diguna enggau silik,” ku iya.
Hari Lima apin lama kami bisi ke Kuala Lumpur betemu enggau menteri (pelajar),batang randau kami iya nya bekaul enggau bekal diesel. Abis nadai ngagai ujung taun penanggul enda chukup bekal diesel enda agi nyadi ba 371 buah sekula (ke agi ngena injin api). Dato Sri Micahel Manyin Jawong Menteri Pelajar,Sains enggau Pansik Teknologi