Sarawak patut diperundingka diberi mayuh agi pangku pengawa nya

KUCHING: Menteri Besai Tun Dr Mahathir Mohamad diansak masa semaya pekara ke-empat baka ke udah dipadah dalam manifesto Pakatan Harapan (PH)’Rebuilding our nation fulfilling our hopes’ nengah nuduh menteri sereta sapit menteri ari Sarawak.

Chairman Parti Tindakan Demokratik ( DAP) pampang Serian, Edward Luak madahka iya enda lantang ati meda rintai lis kabinet menteri enggau sapit menteri ke di idar ngagai mensia mayuh (viral), madahka Sabah ke enda mayuh menang penuduk maya pengawa bepilih besai ke14 (PRU14) tu tadi, diberi peluang ke manah agi.

“Rintai lis nama nya mandangka Sarawak semina deka diberi siku menteri sereta seiku sapit menteri. Sabah, ke semina menang mimit agi kerusi, lalu ditambah agi Sabah semina ‘kaling’ ngagai PH, diberi peluang ke manah agi lebuh Sabah diberi 3 iku menteri,” ku Edward madah nengah penerang dikirum iya, ditu kemari.

“Enti nitih, Sarawak patut diperundingka diberi dua iku menteri enggau tiga iku sapit. Rayat Sarawak enda lantang ati. Enti amat rintai lis nya bansa nya, sigi rayat Sarawak enda lantang ati. Pengawa nya semina ngeringatka rayat menua tu aja,” ku iya.

Iya mega ngingatka pekara ke-4 dalam semaya manifesto PH, iya nya Mulaika Penuduk Sabah enggau Sarawak nitihka Sempekat Malaysia 1963’.

Iya nandu baru madahka enti nitih MA 1963, ngelala Sarawak nyadi sebagi ari kunsi ngempung Serakup Malaysia.

“Bisi 4 kunsi nyadi sempekat entara Malaya, Singapore, Sabah enggau Sarawak. Singapore ningkilka diri ari gempung tauka kunsi nya dalam taun 1965.Tetiap iku kunsi, nitihka leka jaku ‘semengat’ enda sebaka menua, sama ngempung numbuhka sebuah serakup menua ke baru,” ku iya.

Ba pekara bekait enggau pemutus PRU14, Edward madahka kaling PH di Sarawak udah meri 10 penuduk dimenang gempung tu, iya nya enam ari DAP sereta empat ari Parti Keadilan Rakyat (PKR).

“Penyampau nya chukup besai, pengudah dua iku chalun ngatika diri merejuk ngagai PKR,” ku iya.

Pekara ke-4 semaya manifesto PH mesti mansi pemujur ke dipandangka ulih PH maya PRU14 tu tadi. Penuduk pan nambah 4 ari ke sebdau tu semina 6 aja. Undi popular mayuh udah nambah kelebih agi ba sitak alai chalun bediri, ku iya.

Ketegal nya ku iya, pemayuh sukung ke nguing ngagai PH enda tau enda dikelala lalu Sarawak patut diberi perais.

Lalu enti nitihka pemesai menua, Edward madah, Sarawak sebuah sitak menua ke pengabis iya besai, nyauka sama besai enggau Semenanjung Malaysia.

“Enti semina meri siku menteri enggau seiku sapit aja, enda chukup ngelawa pemesai menua Sarawak. Menteri sereta sapit bukai deka ngemeratka menua sida iya empu lebuh ngereja pengawa sida iya.

“Rayat Sarawak gagit endar ati betemu, sereta mending ari ketuai sida. Rayat pan lantang agi ngulai menteri sereta sapit menteri sida iya ke endang asal ari menua tu empu,” ku iya.

DAP pampang Serian ngarap endar Menteri Besai deka berunding nyengkaum rayat Sarawak dalam kabinet PH.

“Beri iya penuduk dalam Opis Menteri Besai dulu, nyangka nyadi orang ke betanggungjawab dalam pekara ke bisi bekait enggau Sarawak. Kitai pan mayuh macham pekara di Sarawak ditu, ke nyadi sebagi ari pemansang menua,” ku iya.

Rintai nama nya mandangka Sarawak semina deka diberi siku menteri sereta siku sapit menteri. Sabah, ke semina menang mimit agi kerusi, lalu ditambah agi Sabah semina ‘kaling’ ngagai PH, diberi peluang ke manah agi lebuh Sabah diberi 3 iku menteri.

KUCHING: Serakup Sarawak for Sarawakians (S4S) mantah peneka Parti Pribumi Bersatu Malaysia (Bersatu) ke dipeda agi balat malut diri enggau UMNO ngerembaika sayap sida iya ngagai menua Sarawak.

Pengari Melayu ari S4S, Basri Hassan madahka iya enggai meda sebuah menua baka Sarawak ke mayuh pemaik dirusak ulih Bersatu, nyema sida iya masuk ke Sarawak.

“Pemayuh macham pupu bansa ke diau di menua tu enggau pemaik, udah lama dikembuan kitai ditu, nyangka nya beratus taun ari jeman Brooke kelia. Tanah, menua tu ‘ rumah’ ngagai semua rayat Sarawak,” ku iya madah nengah penerang iya ditu, kemari.

Beratika Sarawak udah bisi gempung Pakatan Harapan (PH) ke tegap, iya madah utai ke diperatika iya, penama Bersatu kitu ila, semina deka ngelemika kubu PH di menua tu.

“PH nyau nadai pengarap agi ari pengundi sida iya, dataika sida iya nyau mai Bersatu kitu, ke Sarawak ngambika ulih ngenegutka sida iya?,” tanya Basri.

Dalam timpuh nya mega, Basri minta Perintah Menua baruh gempung Gabungan Parti Sarawak (GPS) anang enda munyi tang gaga pengawa sida iya nyadi penyakal ke nyentuk lalu beratika ‘ulah’ Perintah Besai.

“Lalu beratika GPS udah madah kaul entara Perintah Menua enggau Perintah deka digaga bepelasarka kerejasama, GPS patut nagang penama Bersatu ke Sarawak, laban enti enda bansa nya, pengawa bansa tu semina deka madah ngagai mensia mayuh, kaul sida iya (GPS enggau PH) nyerumba ‘boss enggau kuli’ aja, ke nadai bida enggau kaul ke udah enggau Barisan Nasional (BN),” ku iya.

Enti kededua PH menua enggau GPS enda mujur ngetanka Bersatu masuk ke Sarawak, Basri nyadang siti ‘referendum’ meseti dipunka ngemendarka semua rayat Sarawak diberi peluang meri pemutus sida iya ngemendar tauka enda penama parti ‘luar’ ari Sarawak, nyengkaum PH Sarawak enggau PAS.

“nambah enggau nya, udah maya iya ke penyakal ari menua tu empu beserakup negapka kubu lalu besaup pangan diri sereta besedia gawa ke rayat, ngulihka undi rayat menua tu,” ku iya.

“Nengah chara nya, Sarawak enda begunaka parti penyakal ari luar. Niang ex- Kepala Menteri suba, Pehin Sri Adenan Satem kala nyebut parti penyakal sereta orang ke megai Perintah di Sarawak udah chukup, nya alai kitai enda begunaka parti ari Malaya masuk champur pekara politik di Sarawak,” ku iya.

Edward Luak Chairman DAP pampang Serian