DCCI enggau KCCI deka ngatur Gawai Kaamatan kena 7 Julai di Miri
KUCHING: Pengawa ngerami Gawai Kaamatan ke diatur entara Dewan Dagang Dayak & Industri (DCCI) enggau Dewan Dagang Kadazandusun & Industry (KCCI) deka digaga di Miri, kena 7 Julai tu ila.
Chairman Pengatur program tu, Kilat Beriak madah dipelabaka lebih 800 iku mensia mayuh nyengkaum 150 ari Sabah deka datai ngerami Hari Gawai nya, ke disengkaum enggau pengawa makai lemai, ti deka digaga di Eastwood Valley Golf And Country Club, Miri.
Sapit Kepala Menteri Datuk Amar Douglas Uggah Embas deka nyadi temuai ti dibasa ba pengawa makai lemai nya ila, lalu deka bela digulu ulih sepiak pemesai ari Sabah, iya nya Datuk Seri Wilfred Madius Tangau.
Presiden ke mungkal DCCI Tan Sri Datuk Amar Linggi Jugah enggau ex-presiden DCCI ke dulu agi, Tan Sri Leo Moggie Irok, sereta semua penaynding penemu enggau kaban kaunsil besai dama deka ngulu atur pengawa nya.
“Atur pengawa ke digaga begulai bansa tu deka nyadi palan ke bala raban kededua gerempung tu negutka agi kaul dagang sereta kaul entara sida iya empu.
“Pengawa bansa tu mega berat endar alai ngangkatka serakup nasional sereta gulai entara mensia mayuh di Sabah enggau Sarawak, ngipakka sada Perintah kitai,” ku Kilat, ti mega nyadi Sapit Presiden DCCI.
Iya nandu baru madahka kededua buah gerempung nya, DCCI enggau KCCI udah suah endar ngatur idar pengawa tu, baik nya di Sarawak tauka Sabah ari taun 2007.
Linggi, Moggie enggau ex-presiden KCCI, Datuk Dr Makin Marcus Mojigoh enggau ex-menteri Tan Sri Bernard Dompok entara pemesai ke mungkal program tu maya atur pengawa tu keterubah iya digaga. Ke pengerami di Miri ke sekali tu, Kilat enggau komiti iya bisi mai Mojigoh sama enggau ngulu atur pengawa tu.
Ba taun siti nyin tadi, KCCI nyadi tuai rumah atur pengawa tu ke digaga di Puteri Nabalu, Kundasang, ke bela digulu ulih pemayuh raban ari Sarawak.
Kilat mega madahka jaku rambai ke dikena taun tu, iya nya Ngemodenka Pengawa Betanam Betupi Nengah Teknologi Digital’.
Entara program ti bisi dirintaika ke malam nya, iya nya mantaika adat pesaka kededua buah pupu bansa nya, lalu deka digaga ulih pengari ari kededua dewan dagang nya.
Ba lansa bukai, sekretari eksekutif DCCI, Terence Temenggong Jayang bisi madahka raban penyereta atur pengawa tu betuaika presiden dewan dagang Dayak, Datuk Joseph Salang Gandum bisi nemuai meri bas betemu enggau Uggah, hari Satu tu tadi.
Aum enggau Uggah laban deka madah ngagai Uggah pasal pengerami nya, lalu ngangau iya sama enggau ngulu sereta ngepunka pengerami nya.
Sama bisi enggau ngulu penemuai nya, sekretari besai DCCI, Libat Langub, tukang wang, Allan Keripin sereta raban kaunsil besai bukai.