Direktor kompeni enggau luyar Jepak Holdings kena riman SPRM
KUCHING: Direktor kompeni, 59 enggau seiku luyar, 30 kena tan riman ulih Opis Pengawa Nagang Makai Suap (SPRM) lalu diasuh mantu tasat bekait enggau pengawa ‘kontroversi’ kompeni nya ke patut ngaga projek ‘Solar hybrid’ ungkup ke sekula menua pesisir di Sarawak.
Dua iku orang ke ditangkap ulih SPRM di Indu Opis SPRM di Putrajaya hari Dua tu tadi, pengudah penerang ari kededua iku orang nya diambi ulih pegawai SPRM.
Kededua seduai iya udah nya dibai ngagai Kort Majistret Putrajaya pagi kemari.
Lebuh dikerandau ulih pengarang berita kemari, pengari ari opis SPRM nya madahka Majistret Shah Wira Abdul Halim ngemendarka kededua iku seduai nya ditan riman datai ngagai 2 Julai tu ila.
Kededua seduai iya ditasat nengah genteran tusun ukum Seksyen 18 Akta SPRM 2009, ke ngelanggar undang- undang nengah chara melesuka resit, akaun tauka surat ke betuju deka ngelakar.
Enti kededua iku orang tu ditemu salah, seduai iya ulih diukum jil datai ngagai 20 taun, sereta ukum lima kali mayuh agi ari kelim ti digaga seduai iya tauka RM10,000, tauka barang bagi penyampau ke besai agi.
Penyampau projek RM1.25 biliun nya enti nitih, patut dikena mekal elektrik ngagai 369 sekula di menua pesisir di Sarawak nengah pengawa mekal diesel, ngaga sistem solar hybrid sereta nyaga injin api.
Jepak Holdings Sdn Bhd diberi kuntrik projek nya dalam bulan Januari taun siti nyin tadi.
Nitihka ke penerang ari seiku orang (whistleblower Sarawak Report) ke ngeripot pasal pekara nya madahka Menteri Besai (lebuh nya), Datuk Seri Najib Tun Razak enti nitih, ngasuh kuntrik projek nya diberi ngagai kompeni ke bisi bekaul enggau politik, ngujungka proses tauka atur meri kuntrik ke bendar, enda dititih lalu enda ibuhka opis menteri ke patut ngemendarka kuntrik nya, iya nya Opis Menteri Pelajar.
Nitih ku berita, bayar kuntrik nya udah dibayar ngagai kompeni nya, taja pan nadai siti pengawa ke udah digaga.
Kompeni nya bisi udah ngubah sekeda leka jaku (clause) dalam kuntrik nya maya proses ngelekatka bup nya tang ukai ba mua opis menteri ke patut, lalu niru sain kepala pengajar dalam pom pinta.
Lebuh nimbal pasal dawa nya, Jepak Holdings ngaku sida iya sigi amat bisi diberi kuntrik nya nengah pekat terus, tang enda ngaku bisi ngaga penyalah.
Entara sekeda pekara ke bisi dipadah ulih direktor besai kompeni nya, Saidi Abang Shamsuddin madahka kos ke bendar projek nya semina RM750 juta, lalu datai kediatu kompeni nya nadai udah nerima sebarang bayar.
Bedau lama tu ke udah, surat berita The Borneo Post bisi nyebut Saidi netapka kompeni nya enda ulih nganjung diesel ngagai sekula, lalu madahka Opis Menteri Pelajar enda ulih mayar sida iya penyampau RM200 juta ke pengawa ke udah digaga sereta ke udah tembu ari Disember 2017.
“Taja pan sida iya maya nya enda mayar kami, tang kami tetap nganjung diesel ngagai sekula,” ku iya madah lebuh diasuh nimbal bekait enggau cherita baru pasal sekula di menau pesisir di Sarawak ke napi pengurang minyak diesel dianjung ngagai sekula di menua tu.
Taja pia, Saidi nadai madah kebuah bayar ngagai kompeni nya ditan, tang bisi berita bukai ke madahka kebuah nya laban ketegal bisi penyarut ditemu nyadi ulih opis menteri nya bekait enggau pinta (claims) sereta atur kuntrik ke bendar, ke ditemu sereta nyadi pemerat ba Perintah baru, Pakatan Harapan.
Jepak Holdings entara sebuah kuntriktor ari 31 kuntriktor ke mekal minyak diesel sereta nyaga set injin api ke 14 buah sekula di 2 zon di Baram (2015 ngagai 2016), nyengkaum sekula di Mukah enggau Dalat, tang udah nya kompeni nya diberi kuntrik mekal minyak diesel ngagai semua 369 sekula di Sarawak ari taun 2017.
Saidi nyerumba pengawa bansa tu semina ngemaluka opis menteri nya aja, ke meri dalih bayar nya agi di kemutarka naka bulan Januari taun tu tadi, lalu madahka Perintah Besai agi berutang enggau kompeni nya taja pan pengawa sida iya udah tembu.
“Nadai bayar, bakani deka nganjung bekal?” tanya Saidi.