Pengawa bejadi melaki bini ba umur ti agi biak ukai pekara ti manah tang ngasuh napi pemar mansutka diri ari penyeranta
LONG LILIM, BARAM: Pengawa jadi melaki bini maya umur agi biak ba raban bansa Penan di menua ulu Baram agi dikemeran sereta seruran nyadi nyentuk sehari tu.
Kaban Kunsil Nengeri (ADUN) Telang Usan, Dennis Ngau madahka pengawa jadi melaki bini maya umur agi nembiak ba raban bansa Penan ukai siti pekara ti manah, tang ngasuh raban bansa nya napi pemar ngemansutka diri ari perekuh seranta sereta nempa pengidup menyana agi dudi hari.
“Tebal agi sida ti jadi melaki bini datai ari sida ti agi biak, beumur 15 taun, tinggal ari sekula lalu bisi mega baru nembuka pelajar Pom 3, 5 enggau 6.”
“Pengudah sida tinggal (ari sekula), enda pas ba peresa perintah tauka enda nembuka sekula ngujungka sida lenyau pengarap ngulihka pengidup menyana agi ari pelajar,” ku iya.
Sekeda ari sida enda ulih berunding panjai, nadai pengawa ti ulih dikereja agi, tang semina berunding deka belaki bebini aja lalu bisi ruang bilik.
Bejaku rambau bejadika Karnival Lumba enggau Seminar Kerohanian Belia di Long Lilim, Ulu Baram, kemari, Dennis madah pengawa jadi melaki bini ba umur biak tauka nembiak nadai mai pemanah ngagai sesebuah komuniti, kelimpah ari semina nambahka penyampau tubuh ba raban bansa Penan aja.
Kebuah pia ku iya, tebal agi sida nembiak maya umur nya agi kelalu pulu lalu bedau tuai runding kelimpah nadai batang pengawa dikena melanja ruang bilik.
Pekara baka tu tentu nating sida ba pekara belanja enggau nyaup sida sebilik empu sereta mar ngemanahka sosioekonomi ruang bilik sida empu.
Nya alai Dennis ngelalau raban tu ngambika berunding panjai dulu agi sebedau ngaga pemutus belaki bebini lalu bisi ruang bilik ba umur agi biak.
“Kelimpah ari nya, apai indai raban bansa Penan mega patut nyeliahka bala anak sida belaki bebini maya umur agi biak, tang meransang bala anak sida ngemeratka pelajar, dikena ngubah nasit sida sebilik enggau pengidup dudi hari bala anak,” ku iya.
Ku iya, udah umbas endur raban bansa Penan ngemeratka pengawa ngemanahka sosioekonomi ruang bilik enggau komuniti sida lalu ukai nya meransang rebak nembiak belaki bebini maya umur agi biak.
“Meseti ingat pengawa belaki bebini tu ukai chara mutar tauka ngasuh orang nya pansut ari perekuh penyeranta.
“Tang kita deka majak idup seranta laban makin mayuh tubuh dipelanja, enti kita netapka diri nirika ruang bilik nadai sebarang puku,” ku iya nerang silik.
Nya alai Dennis mega ngelalau raban nembiak bansa Penan ngambika enda mudah lenyau pengarap, taja sida enda nyulut ba akademik tauka enda pas dalam peresa, laban tu ukai adan sida ba pelajar.
Tang ku iya, sida tau nampung pelajar dalam bidang pengelandik ba palan latih enggau pengelandik ti bisi besemak di bagi menua Miri enggau mega di nengeri tu.
Ngagai raban bansa Penan ti ngembuan pengelandik jari baka betukang tauka ngaga kraf jari, tu siti pengelebih ngagai sida ngerembaika iya nyadi siti dagang lalu pekara ti patut digaga sida iya nya nambahka penemu sida ba palan latuh ti bisi disedia, tambah mega ku iya, perintah mega nyediaka palan latih enggau bantu belanja ungkup raban kurang penatai pemisi enggau seranta.
“Ari pemisi pengelandik baka tu, kita mega tau ngulihka belanja ti manah agi ungkup diri empu, tambah mega enggau penau pelajar ti diulih ari palan latih enggau pengelandik nya ila,” tandu iya.
Lebih 500 bala nembiak Sidang Injil Borneo (SIB) ari beberapa buah genturung pendiau bansa Penan udah ngambi bagi dalam karnival lumba enggau seminar kerohanian nya.
Tebal agi sida ti jadi melaki bini datai ari sida ti agi biak, beumur 15 taun, tinggal ari sekula lalu bisi mega baru nembuka pelajar Pom 3, 5 enggau 6. Dennis Ngau ADUN Telang Usan