Piak ti deka ngatur program belanda, program bebasikal dipinta nganjung peminta ngagai PJS
SIBU: Piak ti deka ngatur program belanda enggau program bebasikal dilalau nganjung peminta dulu ngagai Pejabat Pesuruhjaya Sukan (PJS).
Chairman Opis Kaunsil Sibu (SMC) Datuk Tiong Thai King madah, tu seririh enggau jaku tangkan ke diterima ari Opis Menteri Pengelantang Mengeri, Pengawa Berumah enggau Perintah Kandang Menua.
“PJS diberi tanggungpengawa beratika piak ti ngatur program baka nya ba pekara wang, ulih ke enda nitihka kriteria teknikal enggau nitihka atur PJS baika nya lumba renggat menua tauka antara- bansa,” pia ku iya madah.
Iya mantaika jaku tu maya betuaika Aum Ninting Bulan SMC ba Opis SMC, Wisma Sanyan ditu, kemari.
Kelimpah ari nya, Tiong maya tu ngelalau piak ke ngatur program meresi kandang endur sida dalam kandang tujuh hari dikena nyeliahka diri ari ditinggang ukum.
“Ambika banding enti bedau ngambi pulai ‘kanopi’ tauka perengka bukai sida tau diukum RM300 sehari lalu pia mega bayar panjar pengelikun RM30,000 deka diambi,” ku iya nerang.
Iya madahka pekara nya maya dipinta meri penemu bekaul enggau kereban baka ‘kanopi’ enggau iya ke bukai enda diambi ba Dataran Bandar Sibu Fasa II taja program udah tembu lebih dua bulan.
Ba pekara bukai, Tiong madahka SMC deka ngena sistem undi ba sida ke bejual di Makit Minggu, Jalai Mahsuri nentuka lot alai bejual.
“Naka ke diatu makit nya bisi 214 iku orang bejual.
“Semua sida tu meseti minta permit dulu ari SMC lalu lot sida bejual deka ditentuka ngena sistem undi,” pia ku iya.