Ukai semina ba bidang pelajar aja tang ari sukut struktur gaji pengereja pengawa bepengelandik mega patut diubah
KUCHING: Pelajar Teknikal enggau Latih Vokasional (TVET) ukai semina patut diangkatka sama tinggi enggau ijazah tauka ijazah sarjana tang struktur gaji mega patut diubah.
Menteri Pelajar, Sains enggau Pemansik Teknologi, Dato Sri Michael Manyin Jawong madahka menua tu patut ulih beratika menua barat ke ulih ngaji pengereja pengawa bepengelandik ngena gaji ke besai.
Iya madahka diri besetuju enggau penemu Chairman Jawatankuasa Pemerkasaan TVET Nurul Izzah Anwar ke deka mekuh mai reformasyen ngagai TVET ngambika dipilih setipak tauka lebih manah ari bidang ijazah enggau ijazah sarjana.
“Aku besetuju enggau YB Nurul Izzah ke nyaga TVET diatu, aku setuju ke iya bekaul enggau (TVET) patut sama tinggi enggau bidang ijazah.
“Tang ukai semina disamaka senentang peninggi aja, struktur gaji mega patut berubah laban menua barat baka Jerman, Australia, England nadai bida ba gawa entara sida ke nyadi injinir tauka tukang paip enggau teknisyen,” ku iya.
Manyin mansutka pekara nya dalam aum pengarang berita pengudah ngemataka pengawa betukar Sempekat Pemereti Ati (MoU) entara Pusat Pembangunan Kemahiran Sarawak ( PPKS) enggau 33 buah sekula iru ari Bagi menua Kuching Samarahan enggau Serian, ti diatur ba Audotirium PPKS ditu, kemari.
Beduduk ari pekara nya, Manyin madahka perintah nengeri nengah opis menteri iya chakah ngelakuka program TVET ngagai nembiak ba nengeri tu.
Ku iya, runding ti bepenemu sereta madahka TVET tauka sekula politeknik sereta pelajar vokasional ungkup nembiak ti tinggal dalam pelajar, patut dibuai.
“Tang sehari tu nengah pendiau ti baru, dunya ke bendar ngemeratka latih pengelandik sereta mayuh orang ti nerima bayar gaji ti manah agi ari sida ke bulih injinia, pelajar akademik enggau ke bukai.
“Nya alai sehari tu kitai deka enggau chakah nguji ngelakuka TVET ngambika nembiak ti masuk sekula vokasional enggau politeknik sereta baka ba PKKS tu enda ngumbai diri tinggal dalam pelajar, tang ketegal pilih deka nyadi pengereja pengawa bepengelandik,” ku iya seraya madahka kerejasama entara PPKS enggau 33 buah sekula nya siti ari chara ngemeratka bidang nya.
Bejaku baru Manyin madahka perintah nengeri benung nyikap bala nembiak betapi enggau industri 4.0, tambah mega penyulut nengeri sehari tu bekaul enggau bidang tu bisi nyulut sereta nyungkak 4 peratus iya nya ari 19 peratus (taun nyin) ngagai 23 peratus taun tu.
Ngarapka nengah program ke dilangkar sereta dipejalaika ulih ngangkatka agi pemanah bidang nya dalam timpuh dua tauka tiga taun ke deka datai, ku iya.
Kelimpah ari nya, Chairman PPKS Tan sri Datuk Amar Abdul Aziz Hussain lebuh ke ngenang pasal MoU nya ba jaku pengelalu madahka program nya setipak enggau misi deka nempa pengereja pengawa ti ngembuan pengelandik ke setipak enggau kompeten nengah pemansang sereta pelajar ti nadai ngetu.
Pengawa nyain MoU entara PPKS enggau sekula sekondari siti komitmen begulai dikena ngangkatka pengawa ngajar enggau belajar ba sekula sekondari, ku Abdul Aziz.
“Nengah Program Sekula Iru tu, PPKS deka begulai enggau sekula sekondari sereta Gerempung Apai Indai enggau pengajar ngatur sekeda aktiviti ungkup pengajar enggau nembiak baka ‘Workshop on Teaching and Learning; Leadership and Skill Camps; Motivational Workshops and ICT’.
“Lalu enggau pemesai guna sereta tuju Industri 4.0 sereta Ekonomi Digital, kami temegah ati ngatur program penyedar ke penguntung pengurusan sekula, kaunselor, pengajar enggau nembiak,” ku iya.
Sama bisi datai ba pengerami nya kemari Ketua Unit, Unit Perhubungan dan pendaftaran Sektor Pengurusan Sekolah, Norzilawati Tajudin (ngarika Direktor Opis Pelajar Nengeri Sarawak), Sekretari Lembaga Pengurusan PPKS Dato Maznah Dasmi sereta Pengarah Eksekutif PPKS Hallman Sabri enggau ke bukai.
Tang ukai semina disamaka senentang peninggi aja, struktur gaji mega patut berubah laban menua barat baka Jerman, Australia, England nadai bida ba gawa entara sida ke nyadi injinir tauka tukang paip enggau teknisyen. Dato Sri Michael Manyin Jawong Menteri Pelajar, Sains enggau Pemansik Teknologi