Siku lelaki dijil 12 taun disipat ngena wi lima kali ketegal penyalah masung

MIRI: Siku lelaki ditinggang ukum ari Kort Seksyen dijil 12 taun enggau disipat ngena wi lima kali ketegal penyalah masung pangan indu iya nya agi baruh umur.

Ukum ti diletak Akim Steve Ritikos pengudah beratika beberapa pekara nyengkaum ngaku salah enggau apil orang dituduh, penerang fakta kes, berat penyalah ti digaga sereta berundingka pemerat mensia mayuh.

Mohd Faizul Mohd Faizal, 24, ari Kampung Cina, Marudi udah didawa nitihka Seksyen 376 (1) Kanun Keseksaan ti tau mai ukum jil 20 taun enggau sipat, enti ditukuka salah.

Nitih ku penerang kes, kena 11 September 2015, indu ti beumur 14 taun lebuh penusah nyadi udah ngaga ripot polis madahka diri udah dipasung orang dituduh.

Asil pansik silik polis tetemuka indu nya enggau orang ti dituduh udah lama bekelala kenyau ari April 2014 lalu suah ngusung rumah pangan diri nyentuk ke seduai bepangan lalu suah beleman.

Kena 11 September 2015, indu nya udah dituku betubuh bisi lima bulan ari raban Sepital Marudi lalu iya udah ngadaka siku anak kena 1 Januari 2016.

Asil peresa DNA ngagai sampel darah indu nya, anak mit ti diada enggau orang dituduh nunjukka pemutus ti setipak.

Ba mua kort, orang dituduh ngapil ukum dilempung laban pekara tu penyalah iya keterubah.

Dulu agi ari nya, lebuh keterubah kes disebut, orang dituduh enda ngaku diri salah lalu kort netapka kes tu dipechara.

Lebuh pechara diatur enggau raban ti bedawa udah ngangau dua iku saksi ngambika meri penerang, orang ti dituduh udah nya madah iya deka nukar penerang ngagai besalah.