SEB deka numbuhka palan nyaga nembiak mit ti keterubah di Sungai Biawak Kuching

LIMBANG: Sarawak Energy Berhad (SEB) deka numbuhka palan nyaga nembiak mit keterubah di Sungai Biawak Kuching dipelaba tembu dua taun agi.

Naib Presiden Eksekutif, Perkhidmatan Korporat SEB Aisah Eden madah pengudah tembu ila, perengkaguna nya ngembuan kapasiti rejista lebih ari 300 iku nembiak taska enggau tadika.

“Projek tu dipelaba tembu dalam timpuh dua taun.

“Kelimpah ari nya, SEB mega nyediaka palan nyaga nembiak mit enda lama di Menara SEB ti dipelaba tembu dalam bulan Oktober taun tu,” ku iya rambau Pengerami Ramah Tamah Aidilfitri SEB Stesen Lim- bang kemari.

Sama bisi datai Pemesai Pelilih Limbang Jamalie Busri, Ketuai Kunsil Opis Pelilih Menua Limbang ( MDL) Kusilor Sufian Mohat, Menijar Stesyen Limbang Sarawak Energy Awang Iderus Rambli, bala pemesai SEB, bala ketuai opis perintah sereta bala komuniti bukai.

Pia mega ku Aisah pengawa numbuhka perengkaguna tu kelai sukung raban sida ngagai apai indai, kelebih agi ngagai eksekutif biak enggau bala indai bekereja, seraya merambu ngelancharka insiatif ti sebaka ngagai kandang menua bukai jemah.

Ku iya, inisiatif bukai ti dipejalai nyengkaum Pro- gram ‘ Women Mentoring Women’ enggau Skim ‘Comeback Career’ ti mega dikunsi begulai bala staf indu di Limbang lalu ulih ngaul diri enggau program ti dipejalai raban sida.

Taun nyin tadi, ku iya, raban sida mega numbuhka Rangkaian Wanita Terkemuka Sarawak Energy (SELWN) ti nyadi rentayan profesional enggau pelasar dikena ngemansangka pengawa nyadi ketuai raban indu enggau nambahka penyereta pekereja indu ba pengawa ngaga pemutus enggau meri sida kuasa nengah program ngatur penau, rentayan profesional enggau pengawa belajar.

“Tu seriris enggau tagit menua enggau Matlamat Pembangunan Mapan Pertubuhan Bangsa- Bangsa Bersatu (SDG) No.5 bekaul enggau pengawa nyemelaka penempa tubuh enggau pengering raban indu,” ku iya.

Bela dipejalai ku iya nyengkaum insiatif tranformasyen digital, sistem SEPS, enggau bemacham inisiatif bukai dikena ngatur pekara armada korporat, ngatur aset, sereta pekara wang engagau pengulih sereta ke bukai.

Dulu agi ari nya, Awang Iderus madahka penyampau peratus penyuah bekal kuasa karan tejanggal di pelilih nya nurun sepenyampau 36 peratus ari bulan Januari 2018 dibida timpuh ke sama taun nyin tadi.

Ku iya, antara kebuah penanggul tejanggal nya nyadi ketegal pangka nyitar/hari enda manah, rusak sambung tali karan/ tiang, kereban elektrik ketegal kabut ti ngujungka pun kayu rebah ngagai sambung tali karan.

Ku iya, raban sida ngemanahka baru bekal dalam timpuh antara 20 ngagai 30 minit.

“Enti bisi rusak ngagai sambung tali karan tu, sistem ngelindung kami deka diaktif tekala nya dikena ngerumban atur pengawa ngemanahka bekal.

“Tu mega siti pekara pengelikun dikena nyeliah balat agi rusak ngagai sistem kami,” ku iya.