PKR Baram udah nerima 700 peminta nyadi kaban parti
MIRI: Parti Keadilan Rakyat (PKR) Pampang Baram udah nerima sepenyampau 700 peminta nyadi kaban parti nya naka kemari.
Sekretari PKR Pampang Baram, Dennis Along madah taja pia penyampau nya patut nengah renggat ‘serenih’ dulu sebedau nya tau dikemendar.
“Semua peminta tu dikemendar ila, deka ngatur kelai pengawa nerima kaban baru rambau aum besai ninting taun ti deka diatur kena 25 Ogos tu ila,” ku iya madah ngagai Utusan Borneo ditu, kemari.
“Sida ti dikemendar nyadi kaban lalu diterima maya aum besai tu ila, mega tau ngundi sereta bediri minta pilih ba sebarang pangku pengawa dalam ranting tauka renggat pampang,” ku iya nambah.
Ku Dennis peminta nyadi kaban ti diterima dalam bulan Ogos tu ila, udah tembu kena 26 Jun tu tadi, tang peminta nyadi kaban agi dipejalai ninting hari.
“Sida ti bisi ati nyadi kaban PKR kelebih agi di Pampang Baram, ungkup peranak asal ari Baram, tau ngelawa opis kami di Bandar Baru Permyjaya ditu,” ku iya.
Dennis mega ngaku, kenyau ari Pakatan Harapan (PH) menang ba Pengawa Bepilih Besai (PRU) tu tadi, nama PKR majak pegari, ngujungka mayuh orang minta diri nyadi kaban.
“Majak mayuh raban nembiak kelebih ari raban umur 20 ngagai 40 taun, minta diri nyadi kaban PKR. Peminta ti diterima kami manah amat pengudah pemujur PH rambau PRU enti dibida sebedau tu.
“Sebedau PRU, kami bisi mega nerima peminta tang enda entu richah baka diatu lalu ngarika raban PKR Baram, kami endang ngelalu mensia mayuh, nadai ngira umur, asal meh 18 taun enggau tuai agi, nyadi kaban PKR, kelebih sida ti bedau kala nyereta sebarang parti politik,” ku iya.
Taja pia ku Dennis, ba peminta ti dianjung pengudah 26 Jun, sida ti dikemendar nyadi kaban lalu diterima dalam PKR Baram ila, semina tau ngundi tauka bediri minta pilih ba sebarang pangku pengawa dalam ranting tauka pampang, ba aum besai September, 2021 ti deka datai.
Ngelansa pasal aum besai ti deka diatur kena 25 Ogos ila, ku Dennis, bisi 60 buah ranting dalam PKR Pampang Baram dipelaba deka datai baum enggau rantinmg bela deka nganjung tiga ngagai lima iku pengari datai ari chairman ranting, sekretari, tukang wang, ketuai indu enggau ketuai Angkatan Muda Keadilan (AMK).
“Hari bulan udah ditetapka kitai, 25 Ogos, tang palan enggau jam deka dipadah ila laban kitai bedau ulih ngenukuka pekara tu.
“Pia mega bala temuai dipebasa ti deka bejadika aum tu ila, laban semua PKR di serata menua, bela ngatur aum sida ba hari bulan besemak enggau nya,” tambah iya.