Kepala Menteri deka bejadika Pengerami Mantai Main Asal Borneo 2018 di Sibu

SIBU: Pengerami Mantai Main Asal Borneo (BCF) 2018 deka dipenyadika Kepala Menteri Datuk Patinggi Abang Johari Tun Openg.

Chairman Opis Kaunsil Sibu (SMC) Datuk Tiong Thai King madah, BCF serak tu deka diatur 10 hari berunggu berengkah 19 nyentuk 28 Julai ba Dataran Bandar Sibu Fasa II.

“Kitai gaga ati laban Abang Johari deka datai bejadi BCF 2018 kena 20 Julai jam 8 malam,” pia ku iya mantaika pekara nya maya betuaika Aum Ninting Bulan SMC ditu, kemari.

Sekeda ari program pemerindang bukai diatur maya BCF 2018 ku iya, mengeri Putian, Fujian enggau Xianning, Hubei ti bela ari menua China deka datai merindang atas panggau tiga hari sebedau pengerami nya abis.

“Kelimpah ari nya, finalis Borneo Talent Award (BTA) 2017 iya nya Bamboo Woods ari Sabah bela dikangau merindang maya nya,” ku iya madah baru.

Tiong andal amat mensia mayuh datai bebala mayuh ngulu BCF 2018 ti dirichah enggau program mandangka macham main asal pupu raban bansa.

Berebak enggau tu mega, iya madahka SMC deka bekerejasama enggau piak polis mutarka isu penyekut jalai maya BCF nya diatur.

Iya madah, sida nerima mayuh sebana ari mensia mayuh bekaul enggau isu nya.

“Kerejasama tu nyengkaum nagang mensia mayuh sepeneka paking kerita sida.

“Pia mega, kitai nagang orang mayuh ngenyati tanda jalai baka ‘barricade’ kelimpah nagang ‘double parking’ sepemanjai jalai,” pia ku iya madah.

Dikena nyeliahka jalai sekut, Tiong minta mensia mayuh tau paking kerita sida ba palan paking kerita Wong Nai Siong( senentang Opis Polis Sentral) enggau palan paking di Jalai Bengkel.

Bayar paking ditu iya nya RM1 sekali tama sepengudah ngelui 5.30 lemai nyentuk tengah malam.

Palan bukai ti tau endur paking kerita ku iya baka di Waterfront Residences di Dataran Bandar Sibu Fasa II enggau Lembaga Pelabuhan Rajang (RPA).