GPS meseti mutarka Penanggul Tanah NCR Mosyen ba pekara bekaul ubah ba Kod Tanah S’wak deka dibantaika ba Aum DUN dalam bulan Julai tu ila
KUCHING: Mantaika mosyen ba pekara bekait enggau ubah ba Kod Tanah Sarawak (KTS) maya Aum Kunsil Nengeri (DUN) ba bulan Julai tu ila penguji ke mudah ngagai chairman sereta semua pemesai Gabungan Parti Sarawak (GPS).
Ketuai Pemadah,Nembiak Parti Rakyat Sarawak (PRS), Andy Lawrence madah penyarut ke nyadi bekait enggau hak Tanah Adat (NCR) pengelama tu ke udah, ngerau semua komuniti Dayak nyentuk ke sehari tu, bedau dipeda bisi pemujur tang mayuh agi ke nempa penyarut sereta besengki penemu entara perintah nengeri enggau orang asal sereta ketuai sida,nyengkaum bebadi nyawa.
“GPS enda tau enda mutarka penanggul tu, meri pengarap ngagai rayat ngambika penanggul tu ulih dikemujurka sereta sebarang penanggul bekait enggau NCR ulih diketuka.
“Sebarang penyalah tauka sebarang pemadah ke enda terang baka perintah nengeri dipadah nadai ati mutarka penanggul nya tauka ngelakar, lalu ketegal nya ila mandangka parti baru dikesema baka ‘arak lama tang di tuang ngagai butul baru’,” ku iya madah nengah applikasyen ‘whatsapp’ ditu, kemari.
Iya nandu baru madahka, nyangka sebagi ari ubah nya ila, tau nyengkaum ngambika Dayak mangku pengawa nyadi Direktor Tanah enggau Survei, ke enti nitih udah lama patut digaga.
“Semua parti komponen GPS bisi orang asal Sarawak, nya alai, pekara tu patut bela disetuju ulih semua komponen, lalu ketuka penusah penyarut bansa tu.
“Chairman GPS, ti mega nyadi Kepala Menteri Datuk Patinggi Abang Johari Tun Openg kala madah, baruh pegai iya, deka nguing ngagai peneka sereta pemerat rayat Sarawak kelebih agi ba pekara ke enda belalai,” ku Andy.
Iya nandu baru madahka Kepala Menteri mega nyamin pemerat tuju GPS enda sebaka kuing enggau Barisan Nasional (BN)ke suba.
“Nya alai, tu peluang emas ke Kepala Menteri ngamatka GPS nya sama bela dalam pejalai pengawa Perintah Menua lalu tau nyadi palan ke rayat Sarawak ngambi pulai baru hak sida iya.
“Udah datai timpuh iya, pekara tauka penanggul tu dikeamatka lalu dipeda nyadi nyata,” ku iya.
Andy madah munyi nya
GPS enda tau enda mutarka penanggul tu, meri pengarap ngagai rayat ngambika penanggul tu ulih dikemujurka sereta sebarang penanggul bekait enggau NCR ulih diketuka. Andy Lawrence Ketuai Pemadah Nembiak PRS
lebuh nimbal pasal salin bekait enggau Ubah ba Kod Tanah Sarawak nya ngemendarka leka jaku ‘native territorial domain’ dikelala sereta diberi kuasa undang-undang, deka dibantaika maya Aum DUN tu ila (Julai 2018)ke dipadah bisi tiris.
Salin ke tiris nya mandangka orang asal tauka Dayak di menua semina diberi hak ‘ usufructuary’ngagai hak orang asal ba Pemakai Menua (PM) enggau Pulau Galau (PG) ke udah tusur tauka nadai agi.
Ketegal salin ke tiris nya ngujungka mensia mayuh di menua tu mantaika pengeringat sida iya ba media rama.
Dalam reti dalam undangundang, hak ‘usufructuary’ mai reti ulih ngena sesiti utai nya, tang ukai orang ke sah ngempu.