Pengerami Makai Lemai Ngiling Tikai DAM dilanjar ngagai 20 Julai
MIRI: Atur pengawa Makai Lemai Ngiling Tikai ti diatur ulih Gerempung Dayak Miri (DAM) ke patut digaga kena 7 Julai tu, diatu udah dilanjar ngagai 20 Julai tang agi ba endur ke sebaka, iya nya di Hotel Mega ditu.
Pengari ari opis DAM, Kitty Janggot madahka kebuah haribulan ditukar laban bisi atur pengawa bukai ke dulu agi, iya nya Opis Kandang Menua Majlis Perbandaran Miri (MMC) ke deka ngena endur nya nyambut Hari Bandaraya Miri ke deka digaga kena 7 Julai tu.
“Atur pengawa Makai Lemai Ngiling Tikai DAM ti deka dipunka ulih Sapit Kepala Menteri Datuk Amar Douglas Uggah Embas, ukai semina deka beratika meri insentif pelajar ngagai bala anak kaban gerempung tang mega ngagai bala DAM ke udah bulih ‘masters’ tauka ‘Bachelor Degree’sida iya ba barang pengelandik.
“Atur pengawa nya mega deka meri basa ngagai bala mayuh ke udah ngangkatka pemesai adat kitai Dayak ba pengawa seni baka kelas ngajat, betabuh nyengkaum betenun, ke bela nyadi pelajar ngagai mensia mayuh ke deka nemu enggau silik agi pasal adat pesaka sereta seni Dayak,” ku iya.
Ba atur pengawa nya mega, deka beratika kaban pemesai DAM ke deka dipadu mangku pengawa sida iya ke timpuh 2018- 2019, ke betuaika presiden ke dipilih, Serawa Budol.
Sida bukai ke bela dipadu nya ila, iya nya sapit presiden Wilfred Mac, mandalpresiden Cr. Mathew Benson Mounsey, sekretari besai Nigel Isut enggau Tukang wang Rowina Sutai Magoi.
Komiti biasa bukai nyengkaum Henry Edward Tarang, Robert Adam, Abin Galieh, Ngadan Melintang, Alice Jeleni Kebeng, Lucas Jangum Ngabong, Albert Bangau Pengarah, Jacqueline Kemping, Janggang Pata enggau Benedict Saran Ingkon.
Lalu ke piak orang indu, Jacqueline Selaka L.F Mawar dipilih baru nyadi chairman lalu bela dibantu ulih Rabi Impen ke dipilih baru nyadi chairman ke piak nembiak.
Atur pengawa makai lemai nya mega deka mantaika mayuh macham pengawa pemerindang enggau seni nyengkaum ajat sereta betabuh ke deka digaga ulih bala kaban gerempung nya ke udah nembuka kelas ajat enggau tabuh sida iya enggau DAM.
Tikit atur pengawa nya agi bisi dijual enggau rega RM50 sepala tauka RM500 semija ke sepuluh iku orang, lalu sida ke bisi ati deka meli tikit tau betanya ba Rabi Impen (0104093913) tauka Jacqueline Selaka (016-8786205) tauka Kitty ba Opis DAM (085435467) maya hari orang gawa.
Ba lansa bekait enggau atur pengawa tu, insentif ke pelajar nembiak dibuka ngagai anak mit ari kaban DAM ke udah mujur ba peresa Perintah baka UPSR, SPM enggau STPM. Sida ke ngambi gelar peresa UPSR enggau SPM, penerima meseti bulih 5A ke atas, lalu ke STPM, penerima meseti bulih 3.00 pointer ke atas.
Ke udah bulih ‘ master’ enggau ‘bachelor’, insentif deka diberi ngagai sida ke baru iya nerima setipikit nya.
Kelimpah ari nya, insentif bukai ke anak kaban DAM ke mujur ba pengawa lumba enggau main, kelebih agi sida ke ngarika menua, nyengkaum Gelam Chunto Apai Indai ke pemadu Manah, pan sama bisi diberi.
Sida ke deka nemu pasal gelar tu enggau silik agi (kaban DAM) tau betanya ba Albert Bangau Pengarah ba lumur 019-8372636.