Penyampau Menteri, Sapit Menteri ari Sarawak ke deka dipadu dilempai ba PM
KUCHING: Chairman Pakatan Harapan (PH) Sarawak Chong Chieng Jien nyerahka ngagai Menteri Besai (PM), Tun Dr. Mahathir Mohamad penyampau chalun Menteri enggau Sapit Menteri ari Sarawak ke deka disengkaum dalam rintai kabinet penuh Perintah Besai ke baru.
“Lis penuh kabinet Perintah Besai ke di ‘viral’ ba media rama ukai lis ke tetap, bedau dipadahka Menteri Besai. Semina Menteri Besai ke bisi kuasa netapka berapa iku menteri enggau sapit menteri ke deka dipadu dalam lis kabinet.
“Nya alai, enti lis nya bedau ditetapka tauka dipadah, aku pan enda ulih nimbal pasal lis nama ke di idar dalam media rama bedau lama tu tadi,” ku iya.
Chong ti mega nyadi Kaban Parlimen Stampin madah munyi nya lebuh diasuh nimbal pasal pekara nya, enti iya bepuas ati enggau kuota seiku menteri penuh lalu seiku agi sapit menteri ari Sarawak dalam lis penuh rintai kabinet baru baka ke di idar dalam media rama ari hari Satu tu tadi, ba aum pengarang berita pengudah ngepunka atur pengawa Makai Lemai Program Latihan Pemantapan Kawad Kecekapan Emergency Response Team (ERT) Zon Selatan Tahun 2018 di Kuching, malam kemari.
Sama bisi enggau ngulu atur pengawa nya, Direktor Opis Bomba enggau Penyah Penusah Malaysia (JBPM) Sarawak, Nor Hisham Mohamad.
Lebuh ditanya enggau silik agi enti iya bisi nerima talipaun ari Tun Mahathir bekait enggau tuduh pangku pengawa nyadi Sapit Menteri Opis Menteri Dagang Dalam Menua, Koperasi enggau Pekara Bebeli Barang, Chong madah, iya nyerahka pekara nya ngagai Menteri Besai mantaika nama penuh lis kabinet nya.
“Enda lama agi nganti lis nama nya, hari Satu tu ila,” ku iya.
Bedau lama tu tadi, lis penuh rintai kabinet baru ke enda ditemu betul tauka enda, di idar di media rama.
Ke semua menteri enggau sapit menteri kabinet penuh dipadah deka ngangkat sumpah ba mua Yang di-Pertuan Agong, Sultan Muhammad V kena 2 Julai tu.