Rumah kedai, opis ke udah bisi setipikit FC enda tau enda numbuhka ERT: Chong
KUCHING: Rumah kedai di menua tu ke bisi setipikit ke diaku Bomba (FC) enda tau enda numbuhka raban ‘Emergency Response Team’ (ERT) sida iya empu, ku Kaban Parlimen Stampin, Chong Chieng Jen.
Ku iya, pengawa tu berat endar dikena beratika bisi pemun bantu ke digaga nyema bisi penusah baka rumah kena empa api.
“Ngembuan penemu ngerara api berat endar kelebih agi rumah ke besai, ke dipasuk ke dalam kategori ke muntang kena empa api.
“Nya alai, bisi siti sistem ngerara api ke silik, iya nya raban ke udah bisi penemu sereta landik baka raban ERT, tau nyelamatka mayuh reta tengkira sereta mensia mayuh lebuh penusah bansa tu nyadi,”ku iya.
Iya madah munyi nya lebuh bejaku ba atur pen- gawa Makai Lemai Program Latihan Pemantapan Kawad Kecekapan ERT Zon Selatan Tahun 2018 ti digaga ulih Opis Bomba enggau Penyah Penusah Malaysia (JBPM) Sarawak di sebengkah hotel ditu, kemari.
Chong madahka ba penemu iya empu, pemisi perengka guna sereta ERT, ngelantangka ati lalu iya berasai temegah ati enggau pemerat pengawa tetiap renggat mensia mayuh ke ngemujurka program sereta latih bansa tu ke digaga begulai enggau Bomba nyengkaum pengawa latih pengelandik bebaris raban ERT.
Iya ngarapka tetiap raban ERT ulih ngena penemu pengawa bomba sida iya lalu landik ngena perengka guna ngerara api, nyelamatka orang ke kena tinggang tasah sereta pengelandik bukai ke diajar ulih Bomba.
“Aku mega ngelaluka penyereta raban ERT ngaga pengawa latih sida iya lalu bekerejasama enggau Opis Bomba, ngambika ulih beratika pengawa kita ngemutarka penyilik pengelikun kena empa api di kedai, rumah tauka opis kita empu,” ku iya.
Raban ERT ku iya, ngembuan tanggungpengawa ke berat mantu piak bomba bejalaika pemerat tanggungpengawa sida iya.
“Nya alai, dikarapka raban tu ulih ngaga pengawa sida iya dalam timpuh ke pandak sereta jampat,kelebih agi dalam pengelikun rumah kena empa api sereta betatika pengelikun nya nyadi pemerat.
“Laban pengelandik kita ngerara api lebuh penusah nya nyadi seraya nganti Bomba datai, mantu ngurangka reta tengkira abis angus sereta napi pengerugi ke besai,” ku Chong.