Program JPJ ke dikemendarka Perintah Besai ke sebedau tu ditanka dulu
KUCHING: Semua program ke bisi digaga Opis Prengka Pengangkut Jalai(JPJ) baka ke ngelama tu, semina ke baru aja mengkang dipejalaika taja pan Perintah Besai udah betukar.
Direktor JPJ Menua Mohd Syafiq Anas Abdullah madahka program baru ke dikemendar Menteri ari baruh perintah ke sebedau tu, naka ke diatu enda ulih dikena dulu.
Iya madah Menteri Pengangkut ke baru, Anthony Loke bisi udah madahka deka mansik baru sekeda ari program ke bisi di JPJ diatu, ngambika penyampau kos ke dikena ila deka meri mayuh agi penguntung ngagai mayuh agi rayat Malaysia.
“Enti bisi pemansang baru, kami madah ngagai kita. Tang ke diatu, semua program ti udah dipunka agi bejalai baka selama.
“Tang program baru, awakka dulu laban engka program baru nya deka di- pansik enggau silik agi ari sukut penyereta sereta kos ngaga,” ku iya madah lebuh dikerandau pengarang berita ba ‘Majlis Ramah Tamah’ ti diatur di Komplek JPJ Sarawak, Jalai KuchingSerian ditu, kemari.
Iya mega nimbal pasal pekara tu bepelasarka penuduk program Satu Komuniti Satu JPJ ti dipunka taun siti nyin tadi, ke dipadah deka meri penguntung ngagai rayat Malaysia ke deka ngambi lisin B2.
Nitih ku penemu Syafiq, program Satu Komuniti Satu JPJ dipunka di empat sitak di Sarawak sebedau Pengawa Bepilih Besai ke-14 (PRU14) tu tadi.
Ku iya, program nya patut digaga di semilan buah sitak tang naka kediatu, semina empat aja ke udah tembu, ketegal Perintah Besai ke betukar.
“Ke taun tu, kami udah bejadika program tu ba empat buah sitak. Tang enti nitih, semilan buah palan ke taun tu.
“Tang laban Perintah Besai udah betukar lalu menteri baru udah madah deka mansik baru program ke udah dikemendarka ulih menteri ke lama, nya kebuah kami agi ngetanka program nya dulu,” ku iya.
Syafiq nandu baru madahka program ke bukai baka ‘ JPJ Bersama Anda’ ( JPJ With You) sereta pengawa ngurangka kompaun trafik sereta sama, agi dipajakka.
Nengah program Satu Komuniti Satu JPJ, iya madah lebih ari 3,000 mensia mayuh di Sarawak teulihka penguntung ari program nya, ari hari iya dipunka taun tu.
Sama bisi enggau ngulu atur pengawa nya kemari, Sekretari Opis Perintah Besai pampang Sarawak, Dato Mansor Man, minta semua opis sereta ijinsi Perintah ngaga kerejasama ke tegut enggau pangan diri taja pan Perintah udah betukar ba renggat Perintah Besai.
Iya madah gaya baka kediatu enda sebaka baka ke udah, tang ari sukut kerejasama, semua opis sereta ijinsi Perintah patut nyaup pangan diri, baka selama.
“Bisi hari ila, kami deka betanya ba Perintah Besai meda bakani ku kitai ulih mantu Perintah Menua ngaga bemacham program sereta pengawa bukai.”
Ba pekara bekait enggau kerejasama, Mansor madah sekeda ijinsi baka Opis Imigresen enggau Opis Pengerijista Pengada enggau Pemati (JPN) sereta Opis Pelajar enda tau enda neritka agi kaul kerejasama sida iya enggau Perintah Menua, ngambika ulih ngaga servis ke bekualiti ngagai mensia mayuh.
“Pengawa Perintah Besai, iya nya majakka pengawa kitai mai pemansang ngagai menua Sarawak, baka ngelama tu,” ku iya.