MAPIM Sarawak ngarap perintah PH lebih beratka isu pemansang di nengeri tu
PUTRAJAYA: Opis Menteri Komunikasyen enggau Multimedia (KKMM) deka ngaga atur lengkas ngemanah servis nadai tatak sereta profesionalisme entiti Radio Televisyen Malaysia ( RTM) enggau Pertubuhan Berita Nasional Malaysia (Bernama).
Menteri iya Gobind Singh Deo madah, atur nya dikena nentuka media nadai tatak bejalaika pengawa lalu engkeman enggau atur perintah.
Semua undang- undang sereta atur bekaul enggau media deka diperesa baru ngambika tatak pengawa media seruran tejamin, ku iya maya ngenataika penerang ngagai raban KKMM ba opis menteri iya ditu.
Iya madah perintah mega benung berunding deka numbuhka sebuah Kaunsil Media diarika kah media, alai ngemata adat sereta nyadi kaunsil pemerati maya mutar kompelin ari mensia mayuh nuju media.
Iya minta raban KKMM ngubah chara berunding sereta gawa nyadi siti raban ngamatka pemaik komunikasi enggau multimedia dalam ngangkat sereta ngubah sektor ekonomi ke pengelantang rayat dalam timpuh enam bulan.
Gobind madah raban KKMM patut seruran nyikap diri enggau penemu sereta pengelandik, kelimpah ngembuan prinsip tegap enggau beintegriti ngambika ulih nerenak chara gawa ti manah, bepikir enggau betul sereta bisi kualiti.
Nya alai, iya madah juluk perintah ti deka ngembuan sistem jalur lebar dua kali lipat pengelaju nengah setengan rega ngambika iya ulih meri rayat pugu perengka guna komunikasyen ti ngasi.
“Tu mega atur keterubah, aku deka ngemujurka juluk ngaga internet nyadi hak rayat Malaysia dalam mai menua nyingkang napi pemar besemekih enggau Brunie, Komboja, Thailand enggau Singapore,” ku iya.
Iya madah endang beguna amat KKMM mutar penanggul kualiti servis nya ngambi iya ukai semina ulih ngamatka peminta orang nyadi chung aja tang mega semua rayat.
Ngelansa pasal ngemaduka Akta Antiberita Tidak Benar, iya madah piak iya deka mansik baru undang-undang bukai ti bekaul enggau ngaga ubah engkeman nitih pendiau jeman enggau teknologi baru.
“Pengawa beratika baru deka dipejalai dikena numbuhka undang- undang tu lebih kering sereta mungkur semua enggau nadai ngira tatak bejaku bepelasarka Undang-Undang Perintah Besai Malaysia,” ku iya.
Gobind madah iya begulai enggau pengereja pengawa opis menteri deka beratika baru strategi sereta kuing sida dalam mansik baru tanggungpengawa ejensi KKKM awakka opis menteri ulih nyingkang enggau nyamai, seriris juluk perintah.
“Kitai patut ngeletak diri nyadi opis menteri ti seruran ngaul, sereta ngerinduka ati rayat,” ku iya. — Bernama KUCHING: Mimbar Permaufakatan Ibu Bapa Malaysia (MAPIM) Sarawak ngarap Perintah Besai ke baru dibaruh pegai Pakatan Harapan (PH) ngemeratka isu pemansang di nengeri tu lebih agi bekaul sekula di menua pesisir.
Tuai Dipebasa MAPIM Sarawak, Omar Immun madah sekula menua pesisir di Sarawak agi jauh tinggal ari sukut pemansang perengka guna.
MAPIM ku iya andal pengurang nya nyadi pemar ngagai raban pengajar dalam nempa nembiak enggau ngaduka sekula menua pesisir nyulut.
“Nya alai, kitai ngarap Menteri Pelajar ke baru Dr Maszlee Malik deka bebendar beratika pekara tu laban ngelama tu kitai meda bisi sekula menua pesisir ke bepenau nyulut dalam peresa perintah.
“Ditu kitai andal maya sekula menua pesisir disikap enggau perengka guna ke chukup, nyadi nya deka meri peransang ngagai bala pengajar enggau nembiak di menua pesisir,” ku iya madah ngagai Utusan Borneo kemari.
Omar ke mega Ketuai Pemadah MAPIM Nasional ngarap deka mayuh agi raban pengajar landik dianjung ngagai sekula menua pesisir dikena ngemansangka agi sistem pelajar ba endur nya.
“Siti agi pekara ke beguna amat iya nya kitai deka meda kerejasama ke manah ba raban menteri ke mangku tanggungpengawa bekaul enggau pekara pelajar ba Sarawak sereta Menteri Pelajar ba renggat perintah besai dikena nentuka pangka ke manah sereta meri penyulut ngagai pelajar di nengeri tu,” ku iya.
Ngelansa pasal nyiri Maszlee nyadi Menteri Pelajar ke baru, iya madah MAPIM Sarawak meda nya siti pilih ke betul bepelasarka pengulih iya sebedau tu ke mega kala nyadi pengajar.
Kenu ku iya ngelama tu mayuh menteri pelajar ke dipadu ukai semina ari bidang ke bekaul aja tang mega tiap kali menteri nya betukar, polisi pelajar menua mega betukar.
“Sebedau tu, kitai meda ninting kali bisi pengawa nyiri menteri ke baru, deka bisi polisi baru digaga lalu ari penemu kediri aku enda setujuka pengawa baka nya.
“Kebuah pia, laban nengah pengawa nukar polisi ba timpuh ke pandak, ambika banding menteri pelajar dipadu ungkup timpuh lima taun udah iya ditukar enggau pekara bukai, nyadi nya deka nambahka tating pengawa pengajar,” ku iya.
Nya alai, ku iya pemutus Maszlee deka neruska Pelin Pemansang Pelajar Pelajar Malaysia ( PPPM) 20132025 tang deka ngemanah agi pekara nya meri pengaga ngagai bala pengajar enggau apai indai.
“MAPIM Sarawak ngasai pengawa neruska PPPM 2013-2025, enggau nyamin sekeda pengawa manah digaga iya ( Maszlee) nyata mandangka pengeransing iya nyukung polisi ke suba.
“Tu beguna amat laban genap polisi ke digaga meseti bisi pemanah lalu pangka positif tetap bisi pekara nya deka dikemanah agi laban genap polisi tetap bisi pengurang,” ku iya.
Berebak enggau nya, ku iya MAPIM ngarap polisi-polisi pelajar ke digaga sebedau tu deka ngembuan pangka manah patut ditampung.
Ku iya, enda patut sesebengkah polisi digaga enggau nadai pansik tauka randau ke panjai dipejalai ba raban menteri enggau bala pemesai tinggi opis menteri.