Bah tunggal balat ngenusah peranak Kampung Tabahan
LIMBANG: Bah tunggal pengelama lebih dua jam ensana balat ngenusah peranak Kampung Tabahan ditu ti betapi enggau rusak reta tengkira enggau rugi beribu ringgit.
Urung 10 buah rumah tama ai ti ngelumpa ari jalai raya ke semak nya ngujungka sida serumah enda sempat nyelamatka barang elektrik enggau jemari ke bela rusak tekala nya.
Bela rusak sebuah kerita dipenggi siku peranak genturung pendiau nya ke dipaking iya ba mua laman rumah ti kena bah urung pukul 3 lemai.
Ketuai raban bansa ba sitak nya Penghulu Abu Tinggal madah, penyadi bah tunggal ensana endang utai ke suah nyadi ninting taun.
“Tu endang bah ketiga kali nyadi dalam timpuh dua taun tu.
“Taun nyin kemari peranak nyabak laban napi bah tunggal ke dua kali nyadi sekumbang timpuh nya.
Iya madah, penyadi Sungai Tabahan ke majak mit tunga ke ili ngujungka ai ngelumpa laku ngagai kandang jalai lalu nya mih ti ngasuh bah nyadi tiap kali bisi ujan bangat.
“Pekara nya udah suah dipadah ngagai ejensi bekaul enggau keretas kereja mega udah dianjung dikena mutarka penanggul bah tunggal ba sitak nya ke manggai agih RM5 juta,” ku iya.
Iya madah, ejensi perintah mega kala bejalaika pengawa meresi sungai enggau parti Tabahan kira dua kali sebedau tu.
Taja pia, kenu ku tusi, orang ke menggi tanah ba sitak Sungai Tabahan nadai ba Limbang maya orang deka nguna iya bekaul pengawa meresi sungai nya.
Kelimpah nya, pengawa nukar tanah ba sitak meresi sungai begunaka besai belanja ngujungka pengawa nya tusah deka dikemujur.
Udah nya, Kaban Parlimen Limbang Hasbi Habibollah maya dipinta nimbal bekaul enggau pekara nya iya madah ejensi perintah patut bejalaika pengawa ti mungkur Opis Parit enggau Entali Ai (JPS) sereta Opis Kereja Raya (JKR) bejalaika pansik penuh sentang sitak nya.
“Kitai udah minta enggau JPS enggau JKR sebedau tu ngambika ngaga pansik penuh mutarka penanggul bah tunggal ba jalai perintah besai enggau gaya sungai ba kandang menua nya.
“Tu mungkur sungai Sembiling, Emok enggau Tabahan sekali nya bisi sumbat tauka ngereja pengawa meresi sungai,” ku iya maya dirnadau kemari.
Ensana Jalai Pandaruan ke besambung enggau mengeri Limbang sereya pelilih Temburong Brunei enggau Lawas kena bah tunggal ketegal ujan bangat.
Penyadi nya ngujungka jalai sekut nyentuk ngagai semak petang.
“Kelimpah polis, empat kaban bomba diuluka Pemantu Penguasa Opis Bomba enggau Penyelamat Malaysia Zon Tujuh Limbang Azman Ibrahim ti bela nyaga penyekut trafik.