Bisi 249 ejensi pemantu polis dikemendar ba serata menua

KOTA KINABALU: Bisi 249 ejensi pemantu polis udah dikemendar ditumbuh ba serata menua nyengkaum sektor perintah, piak bekanun, serikat bekaul perintah enggau universiti-universiti perintah nyengkaum 12 Jun taun tu.

Direktor Opis Penagang Penyalah enggau Pengelikun Komuniti ( JPJKK) Bukit Aman Datuk Seri Tajudin Md Isa madah, unit pemantu polis nya endang bepanggai ngagai Perintah Tetap Ketuai Polis Menua H602, iya nya sida bekuasa ngena kuasa polis dalam bejalaika pengawa matau enggau nyaga statik.

Iya madah unit pemantu polis mega deka meresa mensia mayuh enggau entukar; nyaga sereta ngiring keresa pengaji, nyeliah penyalah-penyalah jai, nyidi enggau nangkap orang salah ba sitak semak serikat.

“Unit pemantu polis dilatih Raban Polis Diraja Malaysia ( PDRM) enggau disiplin sereta pengelandik dalam nentuka sida ngadang maya bejalaika pengawa nyaga pengelikun mensia mayuh,” ku iya bejaku ba Pengawa Nyuaka Setipikit Penumbuh Pemantu Polis sebengkah hotel ditu kemari. Sama bisi datai Sapit Komiti Polis Sabah Datuk Omar Mammah, Ketuai JPJKK Kontinjen Sabah SAC Ahmad Fadzillah Mohamed enggau Sapit Ketuai Pemesai Eksekutif Sutera Harbour Resort Gerard Tan.

Tajudin mega ngelalau semua unit pemantu polis awakka nitih singkang nitih semua undang-undang penumbuh pemantu polis sereta nempa semua kerejasama ke bekaul.

“PDRM enda kakang neritka atur sereta matak pulai kuasa pemantu polis ke udah diberi,” ku iya. — Bernama