Ubah sentang Pemakai Menoa sereta Pulau Galau entara pekara ti udah disengkaum dalam aum kabinet kena 9-18 Julai tu
KUCHING: Kabinet Nengeri udah setuju ubah Kanun Tanah Negeri (KTN) bekaul enggau Pemakai Menoa (PM) sereta Pulau Galau (PG) dibantaika ba Aum Kunsil Nengeri (DUN) ke deka diatur 9 ngagai 18 Julai tu.
Kepala Menteri Datuk Patinggi Abang Johari Tun Openg madahka, nya entara pekara ti disengkaum ba aum kabinet nengeri kemari.
“Nadai mayuh pekara dikerandau sereta aum kabinet baka ke ngelama tu, kelimpah ari kami deka mantaika ubah Kanun Tanah bekaul Pemakai Menoa, Pulau Galau sereta kebukai ba aum Kunsil Nengeri bulan Julai tu,” ku iya lebuh ditanya raban pengarang berita pasal batang aum kabinet nengeri ke diatur pagi kemari.
Dulu ari nya Abang Johari disempulang bini iya Datin Patinggi Datuk Juma’ani Tun Tuanku Bujang datai ngulu Pengerami Gawai Raya 2018 Opis Kepala Menteri, ti diatur ba Bangunan Kunsil Nengeri Lama ditu, kemari.
Berebak enggau tu Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua Datuk Amar Doughlas Uggah Embas lebuh ditanya silik bekaul enggau pekara nya, iya madahka, nganti maya aum DUN diatur.
Uggah madahka nya endang agenda ti dikaum dalam aum Kabinet Nengeri ke alai sida diberi penerang ulih Peguam Besar Negeri pasal langkar ubah rang undang-undang nya.
Iya madahka kabinet udah besetuju lalu pekara nya deka dibantaika iya empu ba aum DUN ke deka datai tu.
“Aku enda ulih meri nuan (pengarang berita) penerang silik pasal tu nyentuk aku mantaika maya aum DUN, tu bedau tau ditusui dulu.
“Tang pekara ke dikerandau sereta diterima Kabinet Nengeri, pagi tadi,” ku iya lebuh dikerandau pengudah iya enggau bini iya Datin Amar Dorren Mayang sama ngulu Pengerami Gawai Raya 2018 Opis Kepala Menteri kemari.
Kelimpah ari nya bekaul enggau Pengerami Gawai Dayak 2018 Opis Kepala Menteri nya ti diketuaika Sekretari Perintah Nengeri Tan Sri Datuk Amar Mohamad Morshidi Abdul Ghani, bisi nyendiaka mayuh macham pemakai enggau ai irup ba 19 buah bansal ke dibuka opis dibaruh Opis Kepala Menteri.
Pengabang ke pemadu dipebasa ke datai sereta bejadika pengerami nya kemari, Tuan yang terutama Yang Di-Pertua Negeri Sarawak Tun Pehin Sri Abdul Taib Mahmud enggau bini iya Toh Puan Datuk Patinggi Raghad Kurdi Taib.
Sama bisi datai ngulu pengerami nya Sapit Kepala Menteri Tan Sri Datuk Amar James Masing enggau Datuk Amar Awang Tengah Ali Hassan, Speaker Kunsil Nengeri Datuk Amar Mohamad Asfia Awang Nassar, bala menteri enggau pengereja pengawa Opis Kepala Menteri.