Sarawak nadai kuasa undang-undang nagang parti politik luar ke nengeri tu
KUCHING: Sarawak nadai kuasa undang-undang nagang parti ari luar ngerembai ke nengeri tu, tang bepanggai ngagai rayat sekalika deka nerima parti nya tauka enggai.
Kepala Menteri Datuk Patinggi Abang Johari Tun Openg madahka nengeri tu endang ngenggaika parti politik ari menua luar tama kitu.
“Bepelasarka undang-undang kitai enda ulih madah enggai, tang bepanggai ngagai peranak Sarawak milih sekalika deka ke parti nya tauka enggai.
“Udah tentu meh kitai enggaika parti ari Malaya datai kitu, parti Sarawak ulih.
“Awakka mensia mayuh nyadi akim, laban di baruh undang-undang aku enda ulih madah enggai, sida ulih datai baru,” ku iya.
Abang Johari ti mega Chairman Gabungan Parti Sarawak (GPS) mansut ke pekara nya lebuh ditanya bekaul enggau tebal agi rayat Sarawak enda setujuka Parti Pribumi Bersatu Malaysia (PPBM) dikerembaika ke nengeri tu.
Rayat Sarawak meri pengarap besai ngagai GPS ulih nagang parti ari menua Semanjung baka PPBM ari ngerembai kitu.
Beberapa hari ke udah, Menteri Besai ti mega Chairman PPBM Tun Dr Mahathir Mohamad di Petaling Jaya apin lama dalam aum pengarang berita pengudah nyadi chairman aum Majlis Pemimpin Tertinggi PPBM madahka, chara nya mega setipak enggau gaya ba nengeri tu ke alai parti politik PH baka PKR enggau Amanah udah bisi ditu kelimpah ari PAS.
Abang Johari disempulang bini iya Datin Patinggi Datuk Juma’ani Tun Tuanku Bujang datai ngabang ngagai Pengerami Gawai Raya 2018 Opis Kepala Menteri ke diatur ba Bangunan Kunsil Nengeri Lama ditu, kemari.
Kelimpah ari nya lebuh ditanya sekalika pengawa ngerejista rasmi GPS udah dikenataika enggau rasmi ngagai Opis Pengerejista Gerempung (ROS), iya madahka pekara nya benung dalam proses.
“(Pengerejista) Bedau dianjung laban logo bedau tembu. Diatu pekit ngaga logo nya (GPS) benung diatur,” ku iya.
Kena 12 Jun apin lama, empat parti komponen Barisan Nasional (BN) Sarawak iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progresif (PDP) enggau Parti Rakyat Bersatu Sarawak (SUPP) pansut ari BN lalu numbuhka GPS.