Pandangka penyampau bayar ngambi lisin deriba
SERIAN: Semua institut alai belajar deriba di Sarawak dilalau mandangka penyampau bayar ti patut dibayar lebuh ngambi lisin deriba.
Mansutka pekara tu, Direktor Opis Perengka Pengangkut Darat (JPJ) nengeri, Mohd Syafiq Anas Abdullah, madahka nya ngambika apai indai enggau orang ti bisi ati ngulihka lisin deriba nemu berapa penyampau ti patut dibayar sida.
Ku iya nambah, pengawa mantaika bayar ba mua mensia mayuh mega deka nyeliahka peragam negatif ari mensia mayuh dikelakar institut endur belajar deriba.
“Opis (JPJ) patut bejejaga laban bisi sekedainstitut alai belajar deriba bisi minta bayar tambah, engka ungkus perengka pengangkut, sida patut mandang ngagai mensia mayuh berapa penyampau ti diletak nyeliahka peragam salah ti madahka institut alai belajar deriba netapka bayar ti enda patut,” ku iya madah ngagai pengarang berita ensanus pengudah bejadika LiaMarc Driving Institutes di Tarat, semak ditu.
Mohd Syafiq nambah, institut belajar deriba mega patut nyediaka pakej bebida ungkup bala pelajar nyentukka sida pas peresa deriba, lalu nerang pakej ke baka nya mega patut dipandang ba mua mensia mayuh.
Iya nyemetak madahka opis udah nerima sebaka ke alai sekeda institut belajar deriba netapka bayar ngagai orang ke belajar antara RM1,800 nyentuk RM2,000 ungkup Kelas D (entukar) nyentukka sida teulihka lisin.
Nitih ku iya, bayar ngambi lisin deriba mutosikal iya nya RM400, RM1, 250 ungkup kerita automatik enggau RM1,200 ungkup kerita manual.
Mohd Syafiq madahka bisi 27 buah institut alai belajar deriba, lalu 10 agi benung digaga, 12 buah sekula belajar deriba di serata nengeri, ke tebal agi sekula alai belajar deriba di menua pesisir enggau pasar.
Pia mega ku iya madah ngagai pengarang berita, sistem e-peresa deka dibai ngagai Sabah enggau Sarawak, seraya nambah, sistem keterubah udah dipejalai di Johor Bahru.
Iya meransang LiaMarc nyadi institut alai belajar deriba keterubah di nengeri tu ngelebaka diri ngena sistem nya.
Di baruh sistem, sensor, kamera enggau komponen bukai deka nyilih pengawa sida ti meresa, baka semua proses nyauka auto magang, sereta mega dikena nentuka penau sida ti deriba.
Kaban kaunsil LiaMarc Driving Institute, Abang Alli Bolhassan madahka ungkus institut nya manggai RM4 juta digaga ba atas tanah pemesai enam ekar.
Sebedau tu, institut di KM75 Jalai Sri Aman-Serian udah beoperasyen pengelama 16 taun.