Pengerembai PPBM meri peluang rayat milih parti politik diri empu
KUCHING: Pengerembai Parti Pribumi Bersatu Malaysia (PPBM) meri peluang ngagai rayat nengeri tu milih parti ke setipak enggau runding politik diri empu.
Pemerati Politik Dr. Saudi Narani madahka pengerembai parti nya nadai meri penanggul ngagai nengeri tu, tang engka bisi penanggul dalam komponen Pakatan Harapan (PH) empu.
“Aku nadai meda penanggul PPBM tama tauka ngerembaika sayap sida ke Sarawak, tang meri peluang ngagai rayat milih parti ti lebih senipak enggau runding politik siku-siku.
“Seagi rayat Sarawak ulih nerima, awakka sida (rayat) nentuka nya. Kuasa nya ba jari rayat.
“Baka parti bukai dalam PH, PPBM mega deka ngenegapka penuduk sida. Nyema bisi penanggul pan nya bekaul enggau berebutka sitak entara komponen PH sereta pekara nya tentu deka ulih diputarka ba peringkat pengurusan PH Pusat,” ku Saudi madah ngagai Utusan Borneo.
Iya meri penemu nya lebuh ke ngenang pasal PPBM ti deka ngerembaika sayap ke Sarawak dikena napi peminta rayat nengeri tu ti deka ke parti nya dikerembaika ditu.
Menteri Besai ti mega Chairman PPBM Tun Dr Mahathir Mohamad di Petaling Jaya apin lama dalam aum pengarang berita pengudah nyadi chairman aum Majlis Pemimpin Tertinggi PPBM madahka, chara nya mega setipak enggau gaya ba nengeri tu ke alai parti politik PH baka PKR enggau Amanah udah bisi ditu kelimpah ari PAS.
Bejaku baru Saudi madahka pengerembai PPBM mega engka bisi empas ngagai nengeri tu lebih agi kandang endur Bumiputera lebih agi kandang endur Melayu.
Iya bepenemu enda ulih dikeenggaika engka bisi pambar ba bansa Bumiputera enggau Melayu, tang nya pekara ke patut ulih diterima.
Trend politik diatu ku iya lebih ngagai parti politik ti ‘multi-etnik’, lalu nyema deka mujur tauka menang patut ulih nerima kaban ari pupu bansa.
Sesebuah parti enda ulih bepanggai ba siti bansa aja laban siti bansa enda ulih kediri numbuhka perintah.
“Nya alai aku meda ba Malaysia, parti baka UMNO, MIC enggau MCA deka terus kena tinggal kelebih agi ba sida pengundi biak.
“Ba Sarawak PBB, SUPP, PBDSB mega deka nerima nasib ti sama sereta majak enda terima ulih pengundi biak ari semua etnik.
“Parti ti bepelasarka jalai pengarap sepenuhnya baka PAS mega enda diterima ba mayuh endur tauka ba semua sitak di Sarawak. Pengundi biak deka terus nulak parti ti ngenanka siti etnik enggau jalai pengarap,” ku iya.
Tang ku Saudi, parti ti nerima kaban enda ngira pupu bansa enggau jalai pengarap deka terus nerima sambut ti manah ba nengeri tu sereta trend ke udah nya.
“Ba perati aku PKR ti ‘multi-etnik’ sereta nerima kaban enda ngira bansa deka terus nerima sambut ti manah ba Sarawak.
“Parti bukai ti ‘multi-etnik’ ba Sarawak baka UPP ti ngemeranka konsep ke sama mega ulih mujur jemah ila sereta majak diterima, lalu nya meh pemanah ngagai UPP ti enda beserakup enggau GPS (Gabungan Parti Sarawak),” ku iya.
Kelimpah ari nya lebuh ke ngenang pasal parti politik ti ‘multi-etnik’ tang beserakup enggau GPS dipeda tusah deka bulih pengelebih besemekih baka PKR enggau UPP laban sama enggau konsep sereta manifesto parti serakup.
Pekara nya ulih dipeda maya Barisan Nasional (BN) alah ba Pengawa bepilih Besai Ke-14 (PRU14) ke alai rayat udah pandai milih parti lalu ‘pasca’ PRU14 bisi pechah dalam BN.
Parti ti pebelasarka etnik majak enda diterima sereta dalam beberapa dekad agi Malaysia deka bejalaika demokrasyen baka sistem dua parti (Dual Party system) baka di Amerika Syarikat sereta sekeda menua bukai.
Kitai ku iya deka seruran terus meda pengerembai enggau transformasi dalam sistem politik nengeri enggau menua, lebih agi.
Iya madahka, seagi parti politik nya nundaka Perlembagaan Malaysia enggau Perlembagaan Negeri sereta enda nulak hak-hak Melayu enggau Bumiputera seagi nya meh parti diterima rayat Malaysia ti sayauka menua.