Perengkaguna di CIQS Tebedu deka dikemanah ngena belanja negeri
KUCHING: Perintah Sarawak deka nguna belanja nengeri ba atur ngangkatmanah perengkaguna di Kompleks Imigresyen, Kastam, Kuarantin enggau Pengelikun Keselamatan (CIQS) Tebedu.
Kepala Menteri, Datuk Patinggi Abang Johari Tun Openg madah kereja ngangkatmanah perengkaguna di CIQS Tebedu dulu agi ari tu deka digaga opis menteri ke bekuasa di Kuala Lumpur.
Tajapia ku iya, pekara nya enda ulih dikemujur ke alai Perintah Sarawak nadai chara bukai kelimpah nguna belanja diri.
“Presiden Republik Indonesia, Joko Widodo udah nemuai ke Sarawak ba taun ke udah lalu iya madah ke aku udah nemuai ngagai Tebedu enggau Entikong.
“Perengkaguna kitai di CIQS Tebedu enda manah lalu kitai nadai pilih bukai kelimpah nguna belanja nengeri ba pengawa ngang- katmanah perengkaguna di CIQS Tebedu.
“Pekara tu ulih digaga enti Petronas meri minyak enggau gis ngagai kitai,’ku iya rambau Program Malam Main Asal Indonesia enggau Sarawak di sebuah hotel ditu, malam ensanus.
Program diatur enggau tuju meri basa ngagai Konsul Jenderal Republik Indonesia, Bapak Jahar Gultom ti deka mindah ujung bulan tu pengudah empat taun gawa di Sarawak.
Kelimpah CIQS Tebedu ku Abang Johari, perintah mega deka ngangkatmanah perengkaguna ari Nanga Badau, Kalimantan, Barat ke Lubok Antu di Sri Aman lalu lanjur ke Penyangkai Kapal Tanjung Manis.
Pengawa nya ku iya deka dikemujur nengah kerejasama Indonesia kelebih agi Kalimantan Barat.
“Aku beratika penyampau dagang entara Nanga Badau enggau Lubok Antu lalu bisi perambu ngaga rel entara Nanga Badau lanjur ke Penyangkai Kapal Tanjung Manis mansa Lubok Antu.
“Perambu rel nya udah tentu deka ngemudahka pengawa nganjung barang enggau servis ari Badau ke Tanjung Manis,” ku iya.
Tajapia, Abang Johari netapka rel nya semina perambu aja ke alai iya enggaika orang salah runding lalu madah Sarawak deka ngaga Transit Aliran Ringan (LRT) di Lubok Antu.
“Enti bisi rel, kitai ulih nganjung kargo ari Badau nuju Tanjung Manis nengah darat.
“Tang tu semina perambu aja lalu ukai kitai deka ngaga LRT di Lubok Antu,” ku iya.
Bela datai Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.