Pengerami Gawai ‘Shell Malaysia Eksplorasi dan Pengeluaran’ richah

MIRI: Pengerami nerima pengabang enggau serumpu makai lemai beserimbai enggau pengerami Gawai diatur Shell Malaysia Eksplorasi dan Pengeluaran (SMEP) ba Kelab Rekreasi Petroleum Lutong chukup richah, apin lama ke udah.

Pengerami ti udah digulu lebih 800 bala staf enggau sida sebilik sereta pengabang ti dikangau datai berami udah diperindang enggau bemacham pemerindang bala pengawa belagu enggau tanda asal pupu etnik di Sarawak.

Antara sida ti bisi datai nyengkaum Direktor Ngatur Pengawa Sarawak Shell Berhad ke lalu nyadi Mandal Presiden Shell Malaysia Upstream, Simon Durkin enggau bini, Liz Durkin, Menijar Besai Aset Sarawak Shell Malaysia, Jill Chieng, Menijar Besai Sabah Shell Petroleum Company, Prithipal Singh sereta bala kaban Shell Leadership Team.

Simon ba jaku dipansutka iya madahka tuju pengerami nya dikena ngerami Gawai ti diintu dalam bulan Jun ninting taun.

Tuju bukai pengerami nya mega dikena ngerapitka kaul bala staf enggau bekunsika penelaba ngintu Gawai ti bela ngayanka pengelain budaya pupu bansa di Sarawak ngagai pengabang antarabansa ny- engkaum ari menua Jerman, Australia enggau England.

“Kami ditu ngerami penyelai ti bisi di Sarawak, kelimpah ngempung rayat ari pupu bansa, pengerami tu nyadi pelasar ungkup kitai ngerami budaya enggau pengawa asal ti manah,” ku iya.

Simon nyemetak madahka Gawai, baka ngintu hari besai bukai nyengkaum Hari Raya Aidilfitri, Deepavali enggau Krismas nyadi awak ungkup rayat bekunsika pengaga enggau pengelantang ati diri.

“Tu patut ditan laban tu mega nyadi awak kitai lim- pang betemu enggau ngusung pangan diri. Tu mega ngasuh kitai mereti agi adat enggau tradisi pangan diri sereta ngeneguhka sintal kaul antara kitai,” ku iya.

Simon mega meri terima kasih ngagai bala ke bisi datai ti udah nyukung enggau pemujur ti udah dibai sida ngelama tu.

Bala pengabang mega bisi dinah pemakai asal nyengkaum manuk pansuh enggau umai rambau atur pengerami ti mega ngaul pengawa miring enggau ngiling tikai ngelai Gawai tembu diintu.

LUNDAI : Tanda asal ari raban bansa Iban, Ajat mega bisi dibantai malam nya. MERINDANG : The Camouflage Band mega bisi merindang bala pengabang ke bisi datai.

SEGULAI SEJALAI : Liz Durkin mantaika penau diri betanda begulai enggau bala bukai.

NGILING TIKAI: Simon (kedua kanan) begulai enggau Jill (kiba iya) enggau Prithipal (kanan iya) lebuh pengawa ngiling tikai.

LANDIK : Tanda Rejang Beuh ari raban bansa Bidayuh.