Sarawak ngerikod 359 kes Leptospirosis antara 1 Januari nyentuk 16 Jun 2018
SIBU: Sarawak bisi ngerikod 359 kesLeptospirosis, ke alai 47 kes udah dituku enggau 311 kes ti disangka antara 1 Januari ngagai 16 Jun taun tu.
Ba penerang berita dikeluar ditu ensanus, Direktor Opis Pengerai Nengeri, Dr Jamilah Hashim madah enti dibanding ba timpuh ke sama dalam taun 2017, 306 kes udah diripot, ke alai 64 kes udah dituku enggau 242 kes disangka, bisi nambah urung 17 peratus (52 kes).
Iya mega beratika naka 16 Jun taun tu, tiga udah dituku parai ketegal Leptospirosis lalu lima iku ti disangka bisi Leptospirosis mega diripot udah parai.
Ku Dr Jamilah, ari timpuh ke sama taun nyin tadi, semua nya bisi dua iku dituku parai lalu 12 iku disangka parai ketegal Leptospirosis ti udah diripot.
Ku iya, kategori kereja ti ditemu mudah agi kena penyakit Leptospirosis iya nya orang ti gawa bekebun, di kampung, raban berikan, tukang meresi, pemantu sereta orang gawa kasar ti ngarika lebih ari 50 peratus ari kes diripot di Sarawak.
“Anang bejalai enda beselap. Kena kasut panjai lebuh engkani jelu tupi kita di belakang rumah enggau gawa tauka bemain di padang tang tu seruran enda dikemeran, ambika chunto, ukai pilih ngena kasut panjai nyadi kereban nyaga ba umai. Selap telih ngena kain enggaika kena ai enti aktiviti enda ulih diseliah.”
Ditanya pasal aktiviti ti patut diseliah mensia mayuh, ku iya, nadai atur besai ba pengawa nagang enggau nyeliah ari leptospirosis ngagai mensia laban nya komplek sereta dinamik epidemiologi.
Ku Dr Jamilah nambah, kaul terus tauka enda enggau ai kemi jelu iya nya pun penyakit tu.
Nya alai, fokus nagang enggau nyeliah pengawa ngurangka pemansut infektif enggau nagang leptospires tama ngagai tubuh enggau enda sengaja.
Mensia mayuh patut seruran ingat masu jari ngena ai beresi sereta sabun, ku iya ngelalau.
Ba pekara sekalika mensia mayuh mega patut nyeliahka diri ari ai ampuh bah laban engka bisi ngundan kemi jelu ti bepenyakit, ku Dr Jamilah, mensia ulih kena sakit enti sida mantaika diri terus tauka kena ai ampuh bah tauka ai ti ngundan kemi jelu ke sakit.
“Mensia mega ulih kena sakit enti sida makai pemakai tauka ngirup ai ti bisi ngundan ai kemi ti kena sakit.”
Ku iya, Leptospirosis iya nya penyakit dibai bakteria Leptospira. Bakteria Leptospira engka bisi dalam ai kemi jelu mamalia ti sakit baka chit, mayau, ukui, chapi, kambin, jani, kuda enggau jelu ke bukai.
Dr Jamilah madahka Leptospirosis enda ulih dipunas laban chit enggau insektivor bisi palan pengundan asal ti besai.
“Ngubah rampa menua dikena ngurangka pematak ekologi (meresi uras enggau ngemanahka sanitasyen) semina tau dipejalai enggau engkeman ba kandang mengeri besai dalam dunya industri.
“Kelimpah pekara rampa menua, pengawa ngubah ulah mensia mega beguna amat.”
Ngenang pasal Lily Pond di Jalai Mamora enggau Jalai Nyangga di Kapit, ku iya, ai nya lubah rarat, ai tekandang lalu ayung ari panchar mata panas, palan ti engkeman alai ngumpul kemi ti kena rampit penyakit Leptospirosis ari chit enggau jelu bukai ti datai ngirup ngagai pegung nya.
Sentang kelai Leptospirosis, Dr Jamilah madahka pesakit engka ngasaika bemacham kelai enti kena rampit bakteria Leptospira baka tabin, pedis pala, pedis urat, mata mirah, kulit sir, pedis perut, batuk, pedis ba betis, jaudis (mata kuning) enggau ai kemi bechura petang.