Media ngembuan kuasa ti besai nempa, ngubah runding rayat di nengeri tu ngambi ulih bebasaka pangan diri
MIRI: Perintah nengeri andal ke pengemeran media ba nengeri tu, ke udah mujur ngetan sereta nyerakupka bansa pia mega enggau lebih 30 etnik ti ngembuan bida ba chara idup, jalai pengarap sereta main asal ke mai ripot enggau penuh komited.
Sapit Speaker Kunsil Nengeri ( DUN) ke mega Kaban Kunsil Nengeri (ADUN) Mulu Datuk Gerawat Gala madahka iya nemu media tu agi besai kuasa ngubah runding rayat di nengeri tu, kelebih agi sentang aspek penyerakup enggau pengelantang entara raban bansa.
Berindik ari nya, iya dekaka raban pengemeran media di kandang menua tu terus ngetanka aspek positif nya, lalu seruran komited ba berita sida dikena nyaga penyerakup bansa di Sarawak lalu nyeliahka pekara ti ulih ngeruga penyerakup, lebuh sida ti nulis berita ke nadai bechiping.
“Media kuat dalam nguasa runding sereta gaya pikir komuniti ti ngelingi nya.
“Nya alai, berindik ari kuasa media ti kuat tu mega ulih dikena ngangkatka penyerakup enggau pemereti ati entara komuniti sereta
Nya alai, berindik ari kuasa media ti kuat tu mega ulih dikena ngangkatka penyerakup enggau pemereti ati entara komuniti sereta ngempung bida rayat pupu bansa, jalai pengarap enggau pengidup. Datuk Gerawat Gala Sapit Speaker DUN
ngempung bida rayat pupu bansa, jalai pengarap enggau pengidup,” ku iya.
Iya madah munyi nya lebuh ti bejaku ba pengerami ‘Gawai Raya NSJA’ ke diatur Gerempung Pengarang Berita Sarawak Utara (NSJA) ba sebuah hotel ditu, bedau lama.
Sama bisi datai ba pengerami nya ADUN Piasau Datuk Sebastian Ting, ADUN Pujut Dr Ting Tiong Choon, Kaban Parlimen (MP) Sibuti Lukanisman Awang Sauni, Presiden NSJA Andy Jong sereta chairman pengatur Michelle Choo.
Beserimbai enggau nya, iya inginka raban media di nengeri tu ngemeranka pengawa ti nadai bechiping dalam berita sida lalu pechaya raban pengarang berita di nengeri tu kelebih agi di Miri, bekereja enggau profesional lebuh ti ngarang berita laban bala pengarang berita tu endang diajar sereta ditempa enggau profesionalisme lebuh ti nulis tetiap berita sida, kelebih agi sentang nyaup ngemansangka menua.
Ku iya, tu mega patut seriris enggau pengerembai media rama kemaya hari tu, ti majak mayuh diatu.
Sentang pengerami makai lemai ‘Gawai Raya’ ke diatur NSJA, Gerawat muji pengawa nya ke dipeda ulih terus meri empas ngagai pengeransing raban pengarang berita ditu, sentang pengawa nentuka pengelantang enggau ulah ti bebasaka jalai pengidup sereta jalai pengarap pangan diri ti bebida penatai asal enggau bansa.
Iya mega andal enggau pengawa NSJA ti udah ngadaka insentif pelajar ngagai anak kaban gerempung nya ti nyulut dalam pelajar sida enggau ti ngarika sekula sida sekalika ba bidang sukan tauka kokurikulum.
“Pengeransing tu udah mandangka bala pengarang berita sedarka pelajar iya nya medium ti pemadu berat dalam pengidup sereta ngagai bala anak sida, dikena nampung pengidup ke manah agi pia mega bisi kualiti dudi hari.
“Pengawa ti ngenuku sereta meri basa ngagai anak kaban gerempung ti nyulut dalam akademik, lumba eng- gau main sereta kokurikulum mega udah ngayanka pengarang berita seruran ngemeratka pekara tu lalu deka nentuka bala anak sida sama begulai enggau rebak ti ngembuan penemu sereta nyadi orang ti menyana,” ku iya.
Ba pengerami ti sama, Gerawat udah madah deka meri geran sepenyampau RM10,000 ungkup NSJA, lalu Lukanisman mega bisi amadah deka meri geran sepenyampau RM5,000.
NSJA mega meri besai terima kasih ngagai ngagai Sebastian laban udah sama meri agih belanja sepenyampau RM5,000 ngagai gerempung nya ungkup wang turu insentif pelajar ngagai bala anak kaban gerempung tu.