Penyerakup, pengelantang rayat meseti dikemeran ke pemansang pupu bansa
SRI AMAN: Penyerakup sereta pengelantang rayat patut terus dikemeran dikena ngemujurka agenda pemansang ngambika menua tu mansang ba taun 2020 lalu nyadi chunto ngagai dunya, pia ku Pemesai Opis Penyerakup Menua enggau Instegrasi Nasional (JPNIN) Bagi Menua Sri Aman Ahmad Noorkamal Abdul Malek.
“Nyema rayat terus ngetanka penyerakup, pengelantang sereta ngembuan ulah ti ulih bebatak asur enggau pangan diri, semua pemansang ti deka digaga ba selampur nengeri tu ulih dipejalai,” ku iya.
Iya madah munyi nya lebuh ti bejaku maya bejadika ‘Malam gawai Raya 2018’ ke diatur Kawasan Rukun Tetangga ( KRT) Taman Desa Indah ti bepalan ba genturung pendiau rumah chairman KRT Wan Jaya ditu malam kilah ensana.
Ku iya, rayat di nengeri tu patut beterima kasih laban penyerakup entara raban bansa lama udah bisi lalu seruran dikemeran.
Kelimpah ari nya, Ahmad mega bisi ngelalau kaban KRT di pelilih tu ngambika seruran bekerejasama enggau pangan diri kelebih agi enggau perintah dikena nentuka agenda penyerakup pupu bansa di pelilih tu.
“Kerejasama entara kededua piak endang patut. Kebuah pia, nyema kitai meri kerejasama ngagai perintah dia semua pekara ti bekaul enggau penyerakup pupu bansa ulih digaga lalu anang kitai enda ingat, kitai mega endang begunaka pemansang lalu sebarang pemansang ke bisi digaga ba kandang menua nya patut disukung.
“Nyema kitai enda ngaga kerejasama ti rat enggau perintah lalu enda nyukung semua polisi pemansang, reti nya kitai mega ngenggaika pemansang ti udah diberi perintah,” ku iya nyemetak.
Dulu agi ari tu, Wan Jaya ke mega Chairman KRT Taman Desa Indah madah penyulut dalam ngatur pengerami nya mandangka pemujur semua komiti KRT ti udah lama begulai ari baruh organisasyen Rukun Tetangga genturung pendiau nya ti enda ngira etnik bansa sereta jalai pengarap udah begempung nengah jalai beserakup dikena nentuka penyulut organisasyen KRT.
“Andal aku madah ngagai semua ti datai lemai tu, KRT genturung pendiau tu udah nyediaka mayuh agenda sereta aktiviti ti ngaul komuniti seriris enggau peminta JPNIN ke deka ngenegutka kaul etnik bansa sereta ngadaka pengelan- tang begulai,” ku iya nandu.
Sama bisi datai ba pengerami nya empat iku Mandal Pemesai JPNIN Sri Aman iya nya Firdaus Ramli, Dunstan Angu, Siti Aishah Mohamad Hajini enggau Shamsuri Ali sereta kaban KRT ke bukai.
Beserimbai enggau nya, pengerami tu mega udah dirichahka enggau mayuh macham aktiviti baka makai lemai, begendang sereta betanda.