Duit jali ari PTPTN patut dibayar taja nama nadai agi dalam ‘blacklist’
MIRI: Sida ti nyanda ari Opis Wang Turu Pelajar Tinggi Nasional (PTPTN) patut mayar utang taja nama sida nadai agi kena ‘blacklist’.
Siku orang gawa perintah semina deka dikelala enggau nama Atop madahka tu enda asi ngagai sida ti udah mayar utang PTPTN ninting bulan.
“Aku mega nyali ari PTPTN lalu utang patut dibayar, enti sida tau raun ke luar nengeri nama kebuah sida enda ulih mayar utang,” ku iya madah ngagai Utusan Borneo.
Ku Atop, beguna amat enti sida ti nyali ari PTPTN mayar utang sekalika diputung ari gaji ninting bulan tauka nitihka pengulih diri empu.
“Enti sida ti nyali enda mayar abis utang, mar amat perintah nyediaka duit jali pelajar ungkup rebak dudi,” ku iya.
Sepenyampau 429,945 nama sida ti nyali ari PTPTN udah dipansut ari lis nama ditagang tauka ‘ balcklist’ Opis Imigresyen dikena nangkup manifesto 100 hari perintah besai.
Ba penemu siku pekereja sektor peribit, Zanariah Kamri madah perintah mega patut bejalaika chara mayar PTPTN baruh agi sereta nginsil ungkus ngatur pengawa.
Tebal agi graduet tauka sida ti udah bekereja bepenatai pemisi di baruh RM3000 sebulan, nya alai, beguna amat perintah ngamatka manifesto ngaul PTPTN,” ku iya.
Pia mega ku Zanariah, ukai semua orang ti ngaji kelebih agi peribit berani ngambi risiko ngaji graduet enggau meri gaji nitihka tikas pelajar dikembuan sida.
“Ari gaya ekonomi kemaya hari, mar amat orang ti ngaji meri gaji ngagai graduet nitihka tikas pelajar dikembuan sida lalu tu antara kebuah penatai pemisi sida ti nyali enda ulih mayar PTPTN,” ku iya nerang.
Taja pia ku iya madah nyemetak, enti sida ti nyali nya tetangkupka bayar tang enggai mayar utang PTPTN, nama sida patut diengkah dalam ‘blacklist’ baru.
Berebak enggau nya, ku iya, taja nama udah dipansut ari lis nama ditagang Imigresyen tang tu ukai reti sida ulih sepeneka ati lalu enda ibuh mayar utang.
“Ungkus ngatur pengawa PTPTN mega deka meruan dipealai lalu enti enda dibayar, ke alai penyampau jali PTPTN mega deka nambah,” ku iya nerang.