PPWE Miri udah ngatur pengerami Gawai, Hari Raya 2018
MIRI: Lebih 50 iku orang lunggar umur udah ngerichahka agi pengerami ngintu Gawai enggau Raya Aidilfitri 2018 Palan Servis Orang Tuai (PPWE) Miri ditu.
Pengerami ti diatur PPWE udah dipenyadi Kaban Kunsil Nengeri (ADUN) Piasau, Datuk Sebastian Ting.
Sebastian dalam jaku bejadi iya muji pengawa PPWE ngempuruka sida ke tuai ari pupu bansa enggau pengarap ba siti pengerami ti richah.
Ku iya, atur pengerami baka nya ulih seruran dipejalai ba sebarang hari besai ti diintu dikena nerenakka pemanah kaul sereta ngenegapka penyerakup kelebih agi ngagai sida ke tuai.
“Endang amat tetiap hari besai di Malaysia diintu begulai dalam pengelantang, nya kebuah kitai mega nyukung atur pengerami nerima pengabang ninting taun,” ku iya.
Berebak enggau nya ku iya, perintah nengeri udah ngemendarka agih belanja penyampau RM84,000 dikena nyeruri PPWE ungkup pengelantang orang tuai dia.
Chairman PPWE, Yii Chiu Seng meri terima kasih besai ngagai semua raban ti udah ngemujurka atur pengerami sehari nya.
Yii mega meri terima kasihka agih belanja perintah nengeri dikena ngemanahka infrastruktur PPWE pulaika pemaik enggau pengelantang sida ke tuai dia.
Sama bisi datai Sekretari Politik Kepala Menteri, Charles Balang ti ngarika ADUN Telang Usan, Dennis Ngau sereta bala pemesai ejensi perintah bukai.
Dennis mega bisi ngemendarka geran Projek Mit Pemansang Menua Pesisir (MRP) ngagai PPWE penyampau RM3000.