Projek ngias ‘Wireless Walk’ dipelaba tembu Oktober tu
MIRI: Projek ngemanah enggau ngias ‘Wireless Walk’ disikap enggau 66 premis alai bejual sereta lima buah ‘food truck’ dipelaba tembu bulan Oktober taun tu.
Menteri Muda Dagang Temuai, Seni enggau Main Asal Datuk Lee Kim Shin madah projek ke beungkus lebih RM3.35 juta nya entara palan ke ulih matak temuai ngagai sitak utara tu.
“Projek bepalan ba puak mengeri Miri sepanjai jalai North Yu Seng digaga kena Februari lalu nitihka atur pelin dipelaba tembu Oktober ila,”ku iya rambau aum pemberita betuaika taklimat pasal projek nya kemari. Sama bisi datai Sapit Residen Bagi Menua Miri Nyurak Keti, Pakar Pemikir Projek Francis Uling, pengari Residen, Opis Kereja Raya (JKR), pemaju, konteriktor sereta bala bukai.
Kaban Kunsil Nengeri (ADUN) Senadin nya madah, projek sepanjai 500 meter nya ngembuan lurung koridor baka ‘kontena’ bela disikap enggau agu.
“Berindik ari sitak nya entara paling kiruh nyadi pengereja pengawa gawa nyembuah iya nya struktur premis baka kontena digaga ba kilang lalu enti udah tembu dibai ngagai taba projek lalu dipasang. Pengawa tu nyau deka manggai 40 peratus.
“Udah nya pengawa baruh tanah sitak nya udah manggai 50 peratus,” ku iya seraya madah projek nya dipejalaika Opis Residen Bahagian Miri sereta dikemata piak JKR Miri.
Nya alai, Lee nyemetak madah piak konteriktor bekaul ngemeranka atur pengelikun pengereja pengawa (HSE) ba palan projek.
Ku iya, tu beguna dikena nyeliah sebarang penusah enda disadang ngagai bala pengereja pengawa enggau mensia mayuh.
Berebak enggau nya, entara projek bukai dipejalai baka ngemanah Bakam Point ti bepalan urung 20 kilometer ari mengeri Miri.
Projek beungkus lebih RM3.5 juta nya disikap enggau premis bejual, premis ikan, jelatung, sereta mayuh perengka bukai baka gelanggang futsal, padang main bol enggau taman rekreasi digaga bulan Februari suba ke ngambi awak 18 bulan endur tembu.
“Naka diatu, kitai dipadah projek nya tembu satu peratus dulu ari perambu. Dikearap kededua projek ( Wireless Walk enggau Bakam Point) ulih tembu nitih perambu,” ku iya.