Peranak Sarawak patut seati ngetan ketuai ti udah dipilih

KUCHING: Peranak Sarawak patut bediri teguh terus ngetanka bala ketuai perintah nengeri ke udah dipilih nengah chara demokrasyen.

Kaban Kunsil Nengeri (ADUN) Engkilili Dr Johnical Rayong Ngipa madahka dawa nengeri tu nyadi penyakal nadai pengamat laban kitai ngatur pengawa nengeri nitihka chuan enggau runding peranak menua tu enggau nadai dibalut politik luar kelebih agi parti datai ari Semenanjung Malaysia.

“Pengudah Pengawa Bepilih Besai Ke-14 (PRU14) tu tadi mayuh raban kelebih agi bala penyakal ngumbai kitai tu penyakal. Pekara tu besibil laban taja kitai alah renggat perintah besai tang renggat nengeri kitai megai perintah ti bisi kuing nyata, meruan begempung ngetanka hak Sarawak ti lenyau ngelama tu diambi bala ketuai Perintah Besai, bepuluh taun pengelama,” ku iya.

Nya alai ku Dr Rayong, peranak nengeri tu patut seruran begempung sereta gawa begulai enggau bala ketuai nengah iring Kepala Menteri Datuk Amar Abang Johari Tun Abang Openg sereta rintai kabinet nengeri iya.

Iya mansutka jaku nya lebuh bejaku rambau Pengerami Ngiling Tikai Gawai 2018 di Rumah Panjai Lidom Ngelambong, Sungai Paya di Ulu Skrang.

Sama bisi datai ADUN Meluan Rolland Duat, bala tuai rumah sereta peranak ari lebih lapan buah rumah panjai di Ulu Skrang nyengkaum lima iku tuai rumah ari DUN Meluan empu.

Ku iya, dalam timpuh tu, perintah nengeri napi penguji laban Perintah Besai ti dipegai Perintah Pakatan Harapan (PH) ti ngalahka perintah Barisan Nasional (BN) ngubah semua polisi sebedau tu.

“Nya alai kitai peranak Sarawak patut seati enggau terus besaup ngetanka nengeri tu nentuka hak baka ti disempekat dalam Sempekat Malaysia 1963 (MA63) ulih dipulaika baru, sebedau ti diambi perintah besai,” ku iya seraya nambah, agih minyak diulih ari kandang tasik nengeri tun mega dipulai setipak enggau nengeri ngeluarka minyak menua ari Petronas.

Ngelansa silik ku iya, polisi perintah ti keran ngemansangka nengeri tu kelebih agi kandang menua pesisir patut disukung laban kitai agi jauh tinggal dibida enggau di mengeri.

“Pemansang ari menua pesisir ngagai kandang mengeri patut dirumban lalu ukai mengeri ngagai kandang menua pesisir laban kandang mengeri udah maju lalu bisi semua,” ku iya.

“Ari nya aku nyadi ADUN Engkilili deka gawa begulai enggau semua ejensi perintah sereta gempung ngatur pengawa dikena nentuka pemansang di DUN tu ulih dipejalai kelebih agi ngaul rentayan jalai alun ti nyadi indu semua pemansang kelimpah Bekal Kuasa Karan Menua Pesisir,” ku iya.

Penemu ke sama bela dibantaika Rolland Duat ti minta rayat beserakup enggau bediri teguh di belakang perintah sebedau tu dikelala enggau nama BN.

“Endang sinu ngenang BN nadai agi tang juluk, niat enggau tuju sereta kuing pejalai perintah nengeri diatu patut disukung enggau ditan nentuka politik perintah nengeri terus idup, negika hak peranak Sarawak.”

“Kitai enda ibuh mendingka jerita dibai sekeda raban ti nguji ngemai penyarut ngagai bala ketuai nengeri enggau perintah besai laban kededua perintah tu tadi bebida ideologi tang kerejasama meruan rat pulaika pemaik peranak Sarawak,” ku iya.

Ku iya, peranak Sarawak endang dipinta kelebih agi ba agih pemansang enda diteju pia aja kelebih agi di kandang menua pesisir baka DUN Engkilili enggau Meluan.

“Nya kebuah aku enggau Dr Rayong suah mantaika penemu tetiap kali aum kunsil nengeri (DUN) diatur laban kami duai sedar patut gawaka kita di kandang menua ulu lalu naka ulih ngemai pemansang perengka guna instrastruktur baka jalai alun, BELB, bekal ai beresi sereta ke bukai ti nyadi hak kita,” ku iya.