Kami deka mansik semua dokumen bekaul enggau MA63, Ripot ‘Inter Goverment’ sereta penumbuh Malaysia ba taun 1963, ku Dominique
KUCHING: Movement Sarawak for Sarawakians ( S4S) ngenuku inisiatif numbuhka siti tim undang- undang ti deka negika Sempekat Malaysia 1963 (MA63) sereta nagih hak enggau kuasa Sarawak ba minyak.
Kaban ‘ protem tim undang-undang’ nya, luyar Dominique Ng madah tim sedia ngadu kerejasama enggau tim luyar nengeri ba pekara ke besangkut paut.
“Kitai deka mansik dokumen ke bekaul enggau MA63, Ripot ‘Inter Goverment’ enggau dokumen bukai ke bekait maya numbuhka Malaysia ba taun 1963.
“Tim undang-undang tu deka ngenan sereta ngambi pulai hak ke patut diempu kitai,” ku Dominique ba aum pengarang berita di Kuching kemari.
Iya nambah, ba pechara entara Petronas enggau Perintah Sarawak bedau lama tu tadi, Kort Federal nadai netapka sebarang pemutus.
Tim undang-undang tu deka ngenan sereta ngambi pulai hak ke patut diempu kitai. Dominique Ng Luyar Protem Tim Undang-Undang S4S
Berindik enggau nya, Dominique ngasai Sarawak patut enda ngetu naka nya aja ketegal isu mengkang enda diputus.
“Enti nadai pemutus ba pekara tu, minyak ke ba dalam kandang Sarawak deka terus diambi Petronas.
“Duduk ngenatka diri ukai chara ke patut digaga, ke alai orang bukai ngerampas pengeraja asal (minyak) kitai,” ku iya.
Nitihka penerang Dominique, asil minyak ari Sarawak ke dikereja Petronas ba taun ke udah manggai 45 biliun lalu gis ngemansutka asil 65 biliun ba taun ke sama.
Ku iya, kededua minyak enggau gis ari Sarawak ngemansut asil lebih 100 biliun.
“Enti kitai ngulihka hak ba pekara tu, kitai bisi penatai pemisi lebih 100 bilion.
“Nadai salah kitai bekunsika pemisi tu enggau Perintah Besai ngambi tau mantu sida. Tang sigi salah sida (Perintah Besai) ngambi semua pemisi nya lalu semina meri 5 peratus aja ngagai Sarawak.
“Diatu mih maya semua nya diketu lalu Sarawak ngempu semua pemisi ari minyak sereta gis lalu gintir Sarawak meri Perintah Besai 5 peratus aja,’ku iya nandu.
Dominique nerang, Ordinan Ngelumbung Minyak 1958(OMO) ke dituku ba taun 1958 iya nya sebedau Sempekat Malaysia 1963 (MA63) tauka sebedau Malaysia ditumbuh deka mantu Sarawak ngulihka kuasa ba minyak.
Konstitusyen Federal ba Genteran 73(3) enggau terang netapka diak sebarang aja undang- undang ke digaga sebedau MA63 deka otomatik nyadi undang-undang Perintah Besai.
Dominique nambah protem tim undang-undang nya deka matak raban luya bukai ari Sarawak nyengkaum seiku luya enggau orang politik ke tebilang, Voon Lee Shang.