Mayuh graduet tusah bulih kereja, puntan jaku English

MIRI: Perintah Pakatan Harapan ( PH) keran meda peranak Sarawak kelebih agi nembiak sekula nguasa Jaku English ngambi pulaika pemaik pengidup sida empu dudi hari.

Kaban Parlimen (MP) Miri, Dr Michael Teo madahka Jaku English nyadi jaku ti dikena di sekayu dunya lalu nyadi pekara pemadu beguna dalam makit kereja.

“Aku beratika mayuh graduet tauka sida lepas sekula tusah bulih kereja ketegal puntan nguasa Jaku English lebuhka betunga (interview),” ku iya rambau Pengerami Ngintu RIMUP Gawai Raya SMK Baru Miri kemari.

Teo beambika chunto Singapore ti ngembuan urung 35 peratus lutur ari menua luar ti gawa di menua Kota Singa nya.

“Nya alai, enti nembiak sekula kitai udah nguasa Jaku English di renggat sekula, bisi awak sida bekereja di menua luar deka besai agi,” ku iya.

Pia mega ku iya, manggaika pemerat ba pekara nguasa Jaku English ukai reti nejuka Jaku Nasional, iya nya Jaku Melayu.

“Ba penemu aku empu beratika pekara nguasa Jaku English tu beguna amat kelebih agi maya deka ngiga kereja jeman kemaya hari,” ku iya.

Kenu ku iya, tebal agi graduet palan pelajar tinggi di menua tu mar ngulihka kereja ketegal kurang nguasa jaku nya.

“Aku beratika tebal agi sida ti nadai kereja di menua tu ti nyadi graduet universiti semina ulih bejaku dalam Jaku Melayu.

“Tu pekara balat ngasuh sinu laban tebal agi serikat begunaka orang gawa ti ulih bejaku dalam Jaku English,” tandu iya.

Sama bisi datai Sapit Pemasai Pelajar Miri, Alias Ngah, Chairman Serakup Apai Indai enggau Pengajar Sekula Sekondari ( SMK) Baru, Iskandar Abdul Rahman enggau Prinsipal SMK Baru, Jerrah Pandin.

Teo mega besemaya deka ngemendarka geran ngagai SMK Baru pengudah nerima agih belanja ari perintah besai.

Pelin Interaksyen Nembiak Ungkup Penyerakup ( RIMUP) SMK Baru diatur ninting taun dikena nambahka pemanah kaul antara pengajar, apai indai enggau bala nembiak.