PMS chukup bebasaka adat komuniti asal di Sarawak

MUKAH: Press Metal Sarawak Sdn Bhd ( PMS) chukup bebasaka pemesai reti adat enggau daya idup komuniti asal di nengeri.

Ulah bebasaka adat enggau daya idup tu nyata ayan nengah pengawa ngintu pengerami ti suah dirami sida.

Nitih ku Sapit Menijar Kilang PMS, Wong Kee Ing, hari besai baka Gawai Dayak suah diintu raban bansa diau ngelingi sida kelebih agi peranak rumah panjai besemak menua Balingian.

“Kitai ngatur Gawai Begulai enggau Komuniti nengah pengerami Mantar Gawai enggau Ngiling Bidai ti nyadi hari besai raban bansa Iban,” ku iya rambau pengerami Ngiling Bidai 2018 PMS di Balai Mayuh Guna PMS apin lama udah.

Kelimpah ari bebasaka raban bansa di menua nya, tu mega ku iya meri awak ngagai bala pekereja PMS bela begulai meda penyelai hari besai nya.

Kebuah pia, semua kitai nemu pekereja PMS ukai semina datai ari peranak menua tu aja tang mega pekereja ari menua luar.

Kelimpah ari nya, program tu mega nyadi siti ari tanggungpengawa rama korporat (CSR) PMS ungkup raban bansa ke diau besemak.

“Pekara tu udah nyata nyaganka PMS endang ngemeratka CSR dalam komuniti besemak lalu ukai semina ngiga untung aja,” ku iya nerang.

Urung 500 iku datai ari pekereja PMS enggau peranak ari 33 buah rumah panjai ngelingi Balingan bela sampal datai ngerichahka pengerami sehari nya.

Pengerami dipungkal enggau pengawa Miring, pengawa beperindang enggau belagu, main sereta pengawa nyuaka perais ngagai bala pemenang.