Sekeda kedai agi nyual produk ikan dalam tin ti bisi ulat
KUCHING: Sekeda kedai agi bisi ditemu nyual produk ikan dalam tin ti udah dituku bisi ngundan ‘bendasing’ iya nya ulat Filum Nematoda, ti meri pengerugi ngagai penguna.
Ketuai Opis Pengerai Mensia Mayuh, Opis Menteri Kaunsil Kandang Menua enggau Pengawa Berumah, Dr Cheong Yaw Liang madahka, pekara nya ditemu maya ke ngabas beberapa kedai ba Padungan ditu kemari sereta iya arap bendar pekara nya mega dipelabaka bisi nyadi ba bagi menua bukai ba nengeri tu.
Iya madahka pengawa meresa produk nya ba kedai deka chakah agi dipejalaika berengkah 30 Jun di selampur Sarawak dikena ngenukuka orang dagang enda ngayan sereta nyual produk nya ngagai pemeli tauka ngelalau penyaga kedai mindahka produk.
Iya nerangka opis menteri nya bisi kuasa bejalaika pengawa nya laban lisin kedai enggau kedai renchit diputuska opis menteri nengah opis kaunsil kandang menua.
“Pengelikun mensia masuk pekara ke pemadu dikemeratka kami. Nyema kami bisi enda ngira kedai ke agi nyual produk nya, kami deka minta sida narit tauka ngeluarka produk nya lalu kitai deka meri surat amaran.
“Berebak enggau tu, surat amaran nya deka dipanjai tauka dikenataika ngagai ejensi perintah ti bekaul baka Opis Menteri Pengerao ngambika produk nya diuji. Kami mega deka madah ngagai Opis Menteri Dagang Dalam Nengeri, Koperasi enggau Pekara Bebeli Barang (KPDNKK) iya nya sida agi nyual produk nya.
“Nyema kedai nya enggai narit tauka ngeluarka produk nya, tindakan deka dipejalaika nitihka undang enggau ordinan ti bekaul enggau nya,” ku iya lebuh dikerandau raban pengarang berita pengudah bejalai meresa beberapa buah kedai ba Padungan ditu, kemari.
Iya nerangka pengawa meresa nya dipejalaika berindika ari enam agi produk ke ditemu ngundan ulat Filum Nematoda ke ditemu Opis Menteri Pengerai, ti dikerembaika ba media rama.
Jenama produk ikan dalam tin ke ditarit pulai Opis Menteri Pengerai nya kemari jenama Cinta, Sea Fresh, Hs Brand, King Cup, Bintang enggau TC Boy. Produk nya datai beberapa hari pengudah ulat nya ditemu ba dua sadin ikan jenama ari menua China - TL Tan Lung enggau TLC.
Ketuai Direktor Opis Pengerai, Datuk Seri Dr Noor Hisham Abdullah dalam penerang berita kena 27 Jun madahka ulat ari genus Anisakis spp deka nyadi penyakit ba mensia lebuh makai pemakai tasik baka ikan ti kena rampit diempa mata tauka enda dipanduk mansau.
Noor Hisham nerangka risiko ngagai pengerai ba produk ikan dalam tin amat baruh laban ulat nya udah mati maya proses manduk.
Taja pia, Dr Cheong madahka ke diatu manah agi enti mensia mayuh enda meli jenama nya laban potensi ulat ulih nyadi.
“Kitai ngarapka mensia mayuh enda meli jenama nya. Enti ba rumah kita endang udah bisi, anang makai iya. Ngagai sida ke bekedai, pulaika baru jenama nya ngagai pemekal sereta pindahka ari rak enggau lengkas.”
Maya ke bejalai meresa nya kemai dipeda beberapa pengempu kedai dipinta Cheong narit tauka ngeluarka jenama nya ari rak sereta nikalka ngagai pemekal enggau lengkas.
Maya ke meresa ba supermarket Everrise , jenama ti ditemu ngundan ulat nya udah dikeluarka, lalu inisiatif nya dipuji Dr Cheong.
“Tikas penyedar pengempu kedai mit agi baruh. Kitai deka meri notis dikena ngangkatka penyedar ngagai pengempu kedai bekaul pekara tu,” ku iya.