SMK St. Anthony udah ngintu Pengerami Hari Pengajar, Gawai Raya
SARIKEI: Bala pengajar dipinta nitihka ubah ti nyadi ngambika sida ulih nangkup pinta ba pengawa ke digaga.
Prinsipal Sekula Sekondari (SMK) St. Anthony, Vincent Liong Shou Chuan nyemetak madahka pekara tu dalam jaku ngelalu iya beserimbai enggau pengawa ngintu Hari Pengajar enggau Gawai Raya renggat sekula kemari.
Nentuka sida ulih nipakka diri kelebih agi ba ubah polisi pelajar nasional, bala pengajar meseti nyediaka diri dikena ngangkatka sida empu nitihka pematut, ku Liong nandu.
Iya mega ngingatka bala pengajar sekula ba pemar ditapi sida dipelaba majak nambah ti dilempaika bala komuniti ngagai sida.
“Kitai bisi kebuah besai endur temegahka penyulut pemutus dijapai dalam peresa perintah tang kitai enda ulih tepantup ati laban bala komuniti seruran ngandalka pekara manah agi ari kitai,” ku iya.
Ba pekara nya, iya ngarap teulihka sukung ari semua raban kelebih agi bala apai indai enggau serakup; Serakup Alumni, raban ngatur pengawa sekula sereta bala komuniti bukai, ku Liong, seraya nambah, ke amat, tu pengawa ti dikereja bala nembiak sekula empu ti ngasuh pekara nyata bebida.
Berebak enggau pengerami tiga dalam satu nya, Liong muji bala pengajar, nembiak sekula sereta apai indai ti udah bebendar gawa ngujungka atur pengerami mujur.
Bemacham pemerindang ti ngayanka kelai pengerami Hari Pengajar, Gawai Dayak enggau Hari Raya bisi dibantaika bala nembiak.
Sama bisi datai Chairperson Serakup Apai Indai enggau Pengajar (PIBG), Maureen Chuan enggau Sapit Chairman, Lei Ko Kien.