Sarawak Workers Party agi siti parti politik ti ngatika diri

SIBU: Sarawak Workers Party ( SWP) agi parti ngatika diri ketegal nyentuk ke diatu empai bisi randau kala diatur enggau Pakatan Harapan ( PH) sentang pemutus parti sida tama parti perintah besai nya.

Presiden SWP, Munan Laja madah, bepun ari nya iya enda ulih madah ka tauka enda parti sida tama enggau PH.

“Naka ke diatu SWP enggau PH empai kala berandauka pekara nya.

“Nya alai, kitai enda madahka diri deka tama nyengulai PH tauka enggai,” pia ku iya maya nimbal tanya ba aum media sepengudah betuaika Aum Exco Kaunsil Besai SWP ditu, kemari.

Aum nya bela digulu Sapit Presiden SWP Engga Unchat.

Berebak enggau tu mega, Munan madahka parti sida berasai gaga meda berita alai Kanun Tanah Nengeri deka diubah ti meri kelala ngagai Pemakai Menua (PM) enggau Pulau Galau (PG).

Taja pan pia, iya madah, nadai penerang ke silik dibantai sentang pekara nya.

Iya mega madah, bisi mega jaku ti empai ditemu pengamat dibantai ba laman rama madahka draft ubah isu nya semina meri ‘ Usu Fructuary Right’ ti semina ngemendarka orang ke beempu tanah ulih ngena tanah tang enda ulih ngempu.

“Naka ke diatu jaku nya jaku sebubu ti empai ditemu amat tang tau nyadi amat tau mega nyadi enda amat.

“Enti amat nadai guna ngaga ubah laban nya nadai mai reti lalu kami SWP bebendar mantah ubah baru tu,” ku iya nerang.

Kelimpah ari nya iya mega minta perintah nengeri ngungkupka belanja dikena bejalaika pengawa survei tanah NCR laban perintah besai ke dulu suba bisi meri belanja belajaika pengawa nya.

Ba aum sida nya kemari, sida bela berandauka isu semilan kilometer ‘Missing Link’ jalai Song/Temalat/Ngemah.

Munan madah, sebedau Pengawa Bepilih Besai Ke- 14 ( PRU14), perintah besai ke dulu suba madahka isu nya deka diputarka alai kontriktor deka datai bejalaika projek bulan Februari taun tu.

“Nyentuk ke diatu kitai empai meda projek nya belabuh digaga.

“Enti nunda projek tu enda patut tejanggal laban belanja udah diberi perintah besai ke dulu suba.

“Kami minta perintah baru ke diatu meseti nandu projek ngaduka ‘ missing link’ tu,” ku iya sambil madahka jalai nya meseti digaga laban semina penembu jalai nya menua Kapit ulih dilawa ngena kerita.

Maya aum nya, kemari, SWP bisi nerima 846 peminta nyadi raban baru ti tebal agi datai ari Song, Bintangor enggau Sibu.

Naka ke diatu SWP bisi 30, 856 iku raban.

Kelimpah ari nya, ba aum tu Wong Hien Ping ari Kakus, John Pagang (Julau), Joseph Agong Buda ( Song), Dennis Patrick Min (Julau) enggau Manja Anggang (Kakus) dipilih nyadi raban exco kaunsil SWP ke baru.