Lumba Olimpik Khas 2018 Renggat Sarawak diatur di UNIMAS, 17-20 Ogos
KUCHING: Lumba Olimpik Khas 2018 Renggat Sarawak deka diatur berengkah ari 17 ngagai 20 Ogos tu di Universiti Malaysia Sarawak (UNIMAS), Kota Samarahan ditu.
Manggai renggat kelima, taun tu atur lumba tu deka diatur Olimpik Khas (SO) Pampang Kuching ti diketuai presiden iya Datin Dayang Mariani Abang Zain.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato Sri Fatimah Abdullah madahka lumba tu diatur dua taun sekali lalu disereta SO Pampang Kuching, Sibu enggau Miri.
Taun tu, sepenyampau 788 iku pesereta deka nyereta lumba tu nyengkaum pemesai gawa sereta raban volunteer ti deka mantu di semua palan lumba.
“Lumba Olimpik Khas tu bebida ari lumba raban nyelai pendiau (OKU) bukai laban iya ngaul bala pesereta ari raban sida ti bepenanggul ba intelektual baka Autitsik enggau Sindrow Down.
“Taja pia kitai pechaya aktiviti lumba baka tu nyadi siti chara dikena nambahka kualiti idup sida kelimpah mantaika penau lumba ti dikembuan sida.
“Naka diatu, pengawa nyediaka diri ungkup Lumba Olimpik Khas renggat nengeri tu bejalai lanchar enggau kerejasama ari semua raban nyengkaum sida ti melanja, LEA Sports Centre enggau JACTIM,” ku iya.
Iya mansutka jaku nya rambau aum pengarang berita bekaul enggau pengerembai lumba OKU dientudi pengawa ngelancharka lambang Lumba Olimpik Khas Nengeri Sarawak 2018 di opis iya di Bangunan Baitulmakmur ditu, kemari.
Ngelansa silik pasal lumba nya, Mariani madah tu deka ngaul atur lumba iya nya trek enggau padang, bocce, nyemerai, main bul enggau boling.
Semua atur lumba deka diatur di UNIMAS kelimpah boling ti deka ngena palan boling di Riverside Bowling Management Sdn Bhd.
Pengawa bejadi kena 18 Ogos lalu bejadi nutup kena 20 Ogos ti deka dipenyadika Fatimah empu ke lalu nyadi Presiden Olimpik Khas Sarawak sereta penyanding penemu ungkup lumba taun tu.
Narit ati atur lumba taun tu, bela deka diatur Program Atlet Sihat (HAP) ti deka disaup 20 iku pelajar perubat Kolej SEGi Sarawak enggau 15 volunteer UNIMAS.