Baru Bian nentapka semaya nya pengudah iya dichiri ngiring opis menteri nya kemari

KUCHING: Menteri Kereja Raya ke baru, Baru Bian keran deka nentuka Opis Menteri Kereja Raya mengkang efisyen, lurus sereta megai tanggungpengawa ba semua pengawa.

Iya entara 13 menteri enggau 23 sapit menteri ti ngangkat sumpah ba mua Yang Dipertuan Agong, Sultan Muhammad V di Astana Negara kemari.

“Aku nguji ngereja pengawa enggau naka pemanah lalu nentuka Opis Menteri Kereja Raya efisyen, lurus enggau megai tanggungpengawa ba semua pengawa.

“Enggau ati ti baruh aku minta berekat ari semua kita bejalaika tanggungpengawa baru tu,”ku iya nengah surat penerang berita pengudah tembu pengawa ngangkat sumpah kemari.

Baru ke mega Kaban Kunsil Nengeri ( ADUN) Ba’ Kelalan enggau Chairman Parti Keadilan Rakyat (PKR) Sarawak ngasai atur nyiri iya nyadi menteri penuh seiti basa ke besai.

“Aku nemu tanggungpengawa portfolio tu chukup berat lalu terima kasih ngagai Tun Dr Mahathir ti udah pechayaka aku,’ku iya.

Ngenang kaul ke sama, Presiden Gempung Orang Ulu Sarawak Malaysia (FORUM), Antonio Kahti Galis madah atur nyiri Baru nyadi Menteri Kerja Raya nyadi sebengkah basa ke besai ngagai komuniti Orang Ulu di negeri tu.

“Jaku puji ngagai YB Baru Bian ti udah dichiri. Terima kasih ngagai Perintah Besai ti pechayaka Baru ti ngarika sebengkah komuniti ti mit,’ku iya.

Antonio mega ngarap atur nyiri Baru nyadi Menteri Kerja Raya deka mai pemansang perengka guna kelebih agi ngagai menua pesisir nyengkaum genturung pendiau Orang Ulu.

Baru ada kena 9 September 1958 ke alai iya kala nyadi luya di Kort Tinggi(1968) lalu mega nyadi pemantu luya di Messrs Anthony Ting &Co (1987-1988) kelimpah nyadi kaling kunsi Anthony Ting, sebedau numbuhka Baru Bian & Co (1992 nyentuk ngagai diatu).

Iya ngepunka pengawa politik ba taun 1987 ke alai iya nyereta Parti Bangsa Dayak Sarawak ( PBDS) nyentuk ngagai taun 2004.

Ba taun 2008, iya nyereta Parti Keadilan Rakyat ( PKR) lalu ba taun 2009 dichiri nyadi Chairman PKR Sarwak sereta nyadi kaban Biro Politik enggau Komiti Tinggi PKR.

Baru nyadi ADUN Ba’ Kelalan pengelama dua renggat berengkah ari taun 2011 pengudah menang ba Pengawa Bepilih Nengeri Sarawak ke-10.

Ba Pengawa Bepilih Besai Ke 14 (PRU14) tu tadi, Baru ngalahka chalun baru Barisan Nasional (BN) ari Parti Rakyat Sarawak (PRS), Rita Insol di sitak Parlimen Selangau.

Enggau ati ti baruh aku minta berekat ari semua kita bejalaika tanggungpengawa baru tu. Baru Bian Menteri Kereja Raya

— Gambar Bernama BALA MENTERI BARU: Yang di-Pertuan Agong Sultan Muhammad V ngemataka pengawa angkat sumpah ba Istana Negara kemari. Ari kiba Menteri Industri Besai Teresa Kok Suh Sim, Menteri Luar Datuk Saifuddin Abdullah, Menteri Kereja Raya Baru Bian, Menteri Dagang...