Pemutus nyiri Baru Bian nyadi Menteri Kereja Raya sigi ngena
KUCHING: Menteri Kereja Raya ke baru, Baru Bian dikearap ulih ngemansang perengka guna di Sarawak.
Menteri ba Opis Kepala Menteri ( Integriti enggau Ombudsman) Datuk Talib Zulpilip pechaya pemutus nyiri peranak Sarawak mangku tanggungpengawa nya sigi ngena.
“Kitai ngajihka YB Baru Bian ulih meri servis ngagai menua kelebih agi Sarawak ti mengkang begunaka pe- mansang ba perengka guna.
“Pekara tu mai pemaik ngagai peranak Sarawak lalu kitai ngarap pemansang ba perengka guna deka majak manah,”ku iya.
Talib mansutka jaku nya lebuh dikerandau pemberita pengudah ngemata pengawa ngangkat sumpah nyeliah ulah makai suap Serakup Pengawa Gudang Malaysia (FMM) ke diatur di seiti hotel ditu, kemari.
Iya nambah Sarawak sigi patut diberi tanggungpengawa menteri penuh ba Kabinet Malaysia ti betuaika Menteri Besai Tun Dr. Mahathir Mohamad.
Ba sentang Chairman Pakatan Harapan(PH) Sarawak Chong Chieng Jen ke dichiri nyadi Sapit Menteri Dagang Dalam Menua, Koperasi enggau Pekara Bebeli Barang( KPDNKK), Talib madah Tun Mahathir sigi ngembuan kuasa ba pekara nya.
“Tajapan sekeda orang beratika diak Chong patut diberi mangku pengawa menteri penuh, aku enda ulih nyaut sentang tuduh nya.
“Tun Mahathir bisi kuasa milih sapa ti dikedeka ke iya ba kabinet,”ku Talib.
Kelimpah nyadi Chairman PH Sarawak, Chong mega mangku pengawa Chairman DAP Sarawak sereta ADUN Kota Sentosa enggau MP Stampin.
Baru ke mega ADUN ba’Kelalan enggau MP Selangau sereta Chong entara 13 menteri enggau 23 sapit menteri ke ngangkat sumpah di Istana Negara kemari.