Siti unit khas dikena ngangkatka lumba raban OKU deka ditumbuh
KUCHING: Siti unit khas dikena ngangkatka lumba raban nyelai pendiau (OKU) di nengeri tu deka ditumbuh di baruh Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit.
Menteri iya, Dato Sri Fatimah Abdullah madahka unit khas tu deka menggi tanggungpengawa ngerembaika semua bansa lumba OKU di nengeri tu enggau sikar agi di baruh siti perabung.
“Kitai udah nyapai pemereti ati enggau Opis Menteri Dagang Temuai, Seni, Main Asal, Nembiak enggau Lumba ke alai lumba OKU deka diengkah di baruh opis menteri ti dipegai aku.
“Kereta langgur penemu udah disedia lalu deka dibantaika kitai dalam kabinet ngambika kita ngatur sebela struktur enggau ke bukai nyengkaum pekara wang,” ku iya.
Iya mansutka jaku nya rambau aum pengarang berita bekaul enggau pengerembai lumba OKU di opis iya di ringkat baruh Bangunan Baitulmakmur ditu, kemari.
Ku Fatimah nambah, sebedau tu lumba OKU ambika chunto Special Olimpics (SO) bediri ngatika diri, pia mega Lumba Orang Bengal Malaysia (SOPMA) sereta lumba OKU ke bukai.
Diatu ku iya, lumba tu deka digempuru di baruh siti opis menteri iya nya opis menteri ti dipegai iya pengudah dikerandau.
“Aku andal tu deka dikemendar kabinet laban aku nadai meda sebarang penanggul ba pekara tu nyengkaum pekara wang enggau ke bukai.
“Tambah mega aku pechaya pengawa tu deka mantu ba pengerembai lumba OKU di Sarawak nyengkaum penyereta atlit OKU kitai dalam lumba bukai.
“Pekara ti beguna agi, ari sukut peminta belanja enggau latih tu deka ulih diatur enggau sikar agi ari bantu Opis Nembiak enggau Lumba di baruh Opis Menteri Dagang Temuai, Seni, Main Asal, Nembiak enggau Lumba,” ku iya.