Genap gerempung diperansang ngatur aktiviti nempa penyerakup
SRI AMAN: Genap gerempung di nengeri tu diperansang ngatur aktiviti ngaul komuniti dikena nerenak ulah beserakup.
Menteri Muda Pengelantang Komuniti Sarawak, Datuk Francis Harden Hollis madah perintah seruran meransang tetiap tubuh komuniti ngaul diri dalam serakup nambahka semangat kerejasama sereta bebasaka pangan diri.
“Kaul bala komuniti dalam gerempung di nengeri beguna amat dikena nyapai juluk sebuah komuniti ti begempung sereta diau bebaik,” ku iya.
Bejaku rambau artu Pengerami Ramah Tamah enggau Pengawa Nyuaka Perais Pekit Ngelagu Lampu Rumah diatur Komiti Ngintu Pengelantang Islam Ketuai Komuniti di sitak Bepilih Kunsil Nengeri (DUN) Simanggang bepalan di Stadium Mini, Sri Aman ditu, malam kemari. Harden nyemetak madah pangku pengawa besai mantaika adat enggau budaya pupu bansa di Sarawak.
“Tetiap bansa di nengeri tu ngembuan adat asal enggau penyelai budaya sida empu, ari beserakup, kitai bisi awak ngangkatka iya tinggi agi,” ku iya.
Ku Harden, semangat kerejasama, bagas sereta lurus gawa bala ketuai sereta kaban gerempung nyadi bansa ulah beguna amat ngetanka penuduk serakup nya.
“Ulah baka tu patut bisi dalam tetiap serakup nentuka serakup seruran chakah gawa sereta ngetanka kerejasama,” ku iya.
Sama bisi datai Sapit Residen Pemansang Bagi Menua Sri Aman, Philip Peter Salam, Penghulu Abdul Samad Abdul Rahim, Pemancha Lee Siang Hua, Penghulu Tiong Chong Onn sereta bala ketuai raban bansa ke bukai.
Berebak enggau pengerami nya, Harden bisi nyuaka geran perintah penyampau RM16,000 ungkup Program Ramah Tamah Aidilfitri sereta perais Pekit Ngelagu Lampu Rumah sereta Trofi Datuk Francis Harden Hollis ungkup taun 2018 ngagai chairman pengatur pengerami, Jolly Ramli.
Iya mega bisi nyuaka geran tambahpenyampauRM51,000 ngagai 22 buah Komiti Pemansang enggau Pengelikun Genturung Pendiau (JKKK) Melayu di sitak DUN Simanggang dikena bejalaika aktiviti sepanjai taun sida.